İQTİSADİYYAT
ƏHALİNİN SOSİAL MÜDAFİƏSİ MƏSƏLƏLƏRİ MÜZAKİRƏ EDİLMİŞDİR
Yanvarın 30-da Əmək və Əhalinin Sosial Müdafiəsi Nazirliyində ötən ilin yekunlarına və 2002-ci ildə qarşıda duran vəzifələrə həsr edilmiş geniş kollegiya iclası olmuşdur.
Nazir Əli Nağıyev iclası açaraq Azərbaycan Prezidenti Heydər Əliyevin rəhbərliyi ilə ölkəmizdə sosial-iqtisadi sahədə həyata keçirilən ardıcıl siyasətdən, əhalinin sosial müdafiəsinin gücləndirilməsi, məşğulluğun təmin edilməsi, əlillərin və az təminatlı ailələrin sosial problemlərinin həlli sahəsində görülmüş işlərdən ətraflı danışdı.
Hesabat dövründə əlillərə, əhalinin aztəmianlı təbəqəsinə, ahıllara, kimsəsizlərə dövlət qayğısının gücləndirilməsi sahəsində həyata keçirilmiş tədbirlərdən söz açan nazir bildirdi ki, ötən ilin may ayında döyüşçü əlillər və şəhid ailələri üçün nazirlik tərəfindən Abşeron rayonunun Mehdiabad qəsəbəsində həyatyanı sahəsi 600 kvadrat metr olan, 2 otaqlı 50 fərdi yaşayış evi, Bakı şəhərinin Xətai rayonunda 36 mənzilli yaşayış binası tikilib istifadəyə verilmişdir. Qarabağ və 20 Yanvar əlillərinə, Böyük Vətən müharibəsi iştirakçılarına “Oka” markalı 150 minik maşını ayrılmışdır. Əlillərin tibbi-sosial və peşə reabilitasiyası, onlara protez-ortopediya xidməti göstərilməsi sahəsində mühüm işlər görülmüşdür. Təkcə nazirlik xətti ilə Qarabağ əlillərinin pulsuz dərman preparatları ilə təmin olunmasına 100 milyon manat xərclənmişdir. Ümumiyyətlə, əlillərin sağlamlığının mühafizəsi və tibbi bərpası üçün Əlilləri Sosial müdafiə Fondu tərəfindən 6 milyard manata qədər vəsait xərclənmişdir.
Əlillərin mənzil problemlərinin həllinə kömək məqsədi ilə ötən il 8 milyard 972 milyon manat vəsait sərf edilmiş, 148 nəfər yeni mənzillə təmin olunmuşdur.
Daha sonra nazir respublikamızda sosial-iqtisadi sahədə aparılan islahatlardan və son illər sosial-əmək sahəsində qəbul olunmuş yeni qanunlardan və onların əhəmiyyətindən danışdı. Bildirildi ki, bir il ərzində məşğulluq xidməti orqanları 19 min nəfəri münasib işlə təmin etmiş, 1505 nəfər peşə hazırlığl kurslarına, 2950 nəfər haqqı ödənilən ictimai işlərə cəlb olunmuşdur. Ötən il işsiz statusu almış 9339 nəfərə qanuna müvafiq qaydada işsizlik müavinəti ödənilmişdir.
Əli Nağıyev güzəştlərin pul kompensasiyaları ilə əvəz edilməsi məsələsinə toxunaraq bildirdi ki, bu, dövlətimizin sosial siyasətinin çox mühüm istiqamətlərindən biridir və nazirlik bununla bağlı üzərinə düşən vəzifəni ardıcıl şəkildə yerinə yetirir. Xüsusi vurğuladı ki, ölkəmizin bir çox iqtisadi problemləri olmasına baxmayaraq, dövlət əhalinin sosial müdafiəsinə ciddi diqqət yetirir. 2002-ci il dövlət büdcəsinin 60 faizindən çoxu sosial yönümlü xərclərə yönəldilmişdir. Natiq dövlətimizin sosial-iqtisadi siyasətini səciyyələndirən bir sıra konkret rəqəmlər sadaladı.
Kollegiya iclasında bildirildi ki, son illər ilk dəfə olaraq nazirliyin nəzdində 130 təsərrüfat yaradılmışdır və onların hər birində 15-30 nəfər işləyir.
Nazir əhalinin sosial vəziyyətinin yaxşılaşdırılması ilə bağlı 2002-ci ildə görüləcək işlər barədə də məlumat verdi. O bildirdi ki, hazırda Bakının Şağan kəndində əlillər və veteranlar üçün 250 çarpayılıq müasir pansionat inşa edilir. İlin sonuna kimi tikintisi başa çatdırılacaq bu səhiyyə-sağlamlıq ocağı Yaponiyadan alınması nəzərdə tutulan avadanlıqla təchir olunacaqdır. Bu il uşaq reabilitasiya mərkəzinin də istifadəyə verilməsi nəzərdə tutulmuşdur.
İclasda qeyd edildi ki, pensiya və müavinətlərin təyinatının, ödənişin kompüterləşdirilməsi, əlillərin məlumat bazasının yaradılmasında kompüter texnologiyasının tətbiqi işləri də uğurla aparılır.
Kollegiya iclasında nazirliyin bölmə rəhbərlərinin hesabatları da dinlənildi.
İclasda 2002-ci ildə əhalinin sosial müdafiəsinin gücləndirilməsi ilə bağlı nazirliyin struktur bölmələrinin qarşısında qoyulmuş konkret vəzifələri müəyyən edən geniş qərar qəbul olundu.
Nazir Əli Nağıyev kollegiya iclasına yekun vurdu.