CƏMİYYƏT
“EKOLOGİYA İLİ” ÇƏRÇİVƏSİNDƏ BAKININ BİR SIRA RAYONLARINDA AĞACƏKMƏ KAMPANİYASI KEÇİRİLMİŞDİR
Bakı, 3 aprel (AZƏRTAC). Azərbaycan Respublikası Prezidenti İlham Əliyevin 2010-cu ili “Ekologiya ili” elan etməsi ilə əlaqədar aprelin 3-də Bakının bir sıra rayonlarında növbəti ağacəkmə aksiyaları keçirilmişdir.
Nəsimi rayonu. Paytaxtın Nəsimi rayonunda dövlətimizin başçısının yaşıllıqların qorunması, ağacların əkilməsi və ekoloji mühitin sağlamlaşdırılması ilə bağlı verdiyi tapşırıqlara uyğun olaraq idarə, müəssisə və təşkilatların nümayəndələri böyük mütəşəkkilliklə iməciliyə çıxmışlar. Səməd Vurğun, Ənvər Qasımzadə, Dilarə Seyidzadə küçələrində, eləcə də Tbilisi prospektində 300-dən artıq həmişəyaşıl və dekorativ ağac, gül kolu əkilmişdir. Rayonun mindən çox sakininin iştirak etdiyi iməcilikdə yeni əkilən ağaclara, eləcə də mövcud yaşıllıqlara qulluq göstərilmiş, park və xiyabanlarda, məhəllə və həyətlərdə abadlıq, quruculuq işləri aparılmışdır.
X X X
Nərimanov rayonu. Nərimanov rayonunda da abadlıq və quruculuq işləri davam etmişdir. Rayonun ayrı-ayrı idarə, müəssisə kollektivləri və ictimaiyyət nümayəndələrinin iştirakı ilə Heydər Əliyev prospektində 160-dan çox ağac və gül kolu əkilmişdir. İtaliyadan gətirilmiş 6 metr hündürlüyündə dekorativ ağaclar göz oxşayır. Rayondakı Bağça-Məktəb -Lisey Kompleksinin həyətində də abadlıq işləri görülmüşdür. Rayonda “abad məhəllə” layihəsinə də start verilmişdir. “Azadlıq” prospekti, 151 ünvanındakı həyətlərdə əhalinin istirahəti üçün kiçik park və mini - futbol meydançası da istifadəyə verilmişdir. Kiçik yaşlı uşaqlar üçün əyləncə qurğuları quraşdırılmışdır. Bu ilin sonunadək rayonda 20 minədək ağacın əkilməsi nəzərdə tutulmuşdur.
X X X
Yasamal rayonu. Yasamal rayonundakı Mətbuat prospekti, Firudun Ağayev və Məmməd Rahim küçələri arasındakı 1500 kvadratmetr ərazidə iməcilik işləri aparılmış, 500-dən çox ağac tingi əkilmişdir. Rayon icra hakimiyyətinin başçısı İbrahim Mehdiyevin də iştirak etdiyi tədbirdə 400-ə yaxın zeytun və sərv ağacı əkilmiş, onların suvarılması təmin edilmişdir.
Ümummilli lider Heydər Əliyevin doğum günü ərəfəsində rayonda binaların həyətlərinin abadlaşdırılmasına da başlanmışdır. Nazim Hikmət küçəsi, 25 nömrəli evin 2 min 400 kvadratmetrlik həyətində abadlıq işləri aparılmışdır. Ərazidə zeytun və küknar ağacları əkilmişdir. Akim Abbasov küçəsindəki yaşayış binalarının həyətlərində də 1200 kvadratmetr sahədə ağac tingləri əkilmiş, sakinlərin və uşaqların istirahəti üçün şərait yaradılmışdır. Bundan əlavə, Şərifzadə küçəsindəki bəzi binaların həyətlərində də abadlıq işləri görülmüş, vətəndaşların qanunsuz zəbt etdiyi torpaq sahələrinin hasarları sökülmüşdür.
X X X
Xətai rayonu. “Ekologiya ili” çərçivəsində Xətai rayonunda da ağacəkmə kampaniyası davam etmişdir. Rayon icra hakimiyyətinin başçısı Razim Məmmədovun da qatıldığı aksiyada ümumilikdə 2 min nəfər iştirak etmişdir. Rayonda üç mindən çox ağac və kol əkilmişdir. Kampaniya rayonun Nobel və Babək prospektlərində, Zığ rayonunda, eləcə də Heydər Əliyev parkında, Yusif Səfərov küçəsində və digər ərazilərdə aparılmışdır. Burada müxtəlif növ ağaclar, o cümlədən, küknar, Eldar şamı və Xan çinarı əkilmişdir. Quruyan ağaclar yeniləri ilə əvəzlənmişdir. Ağacların inkişafı üçün gübrələr verilmiş və yeni su xətti çəkilmişdir. Ərazi zibilliklərdən təmizlənmişdir. Rayonun florasının zənginləşdirilməsi məqsədi ilə xarici ölkələrdən, o cümlədən Bolqarıstan, İspaniya və İtaliyadan ağaclar gətirilmişdir.
Aksiyada rayonun təhsil, səhiyyə və digər müəssisələrinin nümayəndələri ilə yanaşı, sakinlər də iştirak etmişlər.
X X X
Nizami rayonu. Dövlətimizin başçısının təşəbbüsü ilə 2010-cu ilin “Ekologiya ili” elan olunması ilə əlaqədar Nizami bələdiyyəsi tərəfindən ağacəkmə, yaşıllaşdırma və abadlıq işləri aparılır. Rayonun Şirin Mirzəyev və Şərifli küçələrinin kəsişməsində 200-ə yaxın ağac əkilmişdir. Aksiya Oqtay Vəliyev və Mikayıl Əliyev prospektlərində də keçirilmişdir. Kampaniyada bələdiyyə üzvləri ilə yanaşı, rayon icra hakimiyyəti, mənzil kommunal təsərrüfat birliyi və digər təşkilatların rəhbərləri iştirak etmişlər.
Tədbir çərçivəsində ərazi daşlardan təmizlənmiş, digər zəruri abadlıq işləri görülmüşdür. Nizami bələdiyyəsi ərazidə əkilən ağaclara qulluq göstərməyi öz öhdəsinə götürmüşdür. Rayon sakinləri ətraf mühitin qorunmasında, ekoloji saflığın mühafizəsində əvəzsiz rolu olan yaşıllığın qorunması naminə həyata keçirilən tədbirləri bundan sonra da davam etdirəcəklərini bildirmişlər.
X X X
Binəqədi rayonu. Binəqədi rayonunda yaşıllıqların artırılması ilə bağlı müvafiq tədbirlər görülür. Rayonun kənd və qəsəbələrində keçirilən bütün təşkilat və kollektivlərin nümayəndələri yüksək fəallıq göstərmişlər. Müxtəlif ağac növləri insanların sağlamlığına müsbət təsir göstərməklə yanaşı, rayonun ümumi mənzərəsinə də yeni çalarlar əlavə edir. Təzə əkilən ağacların suvarılması üçün rayon mənzil kommunal təsərrüfat birliyinin və yaşıllaşdırma idarəsinin əməkçiləri ərazidə müvafiq tədbirlər görürlər. Su xətləri olmayan yerlərdə hələlik suvarma işləri maşınlarla həyata keçirilir. Yeni əkilən mindən artıq ağaca artıq indidən aqrotexniki qulluq göstərilir.
X X X
Qaradağ rayonu. Paytaxtın Qaradağ rayonunda da ağacəkmə kampaniyası keçirilmişdir. Rayonun bütün müəssisə, idarə və təşkilatların əməkdaşları öz ərazilərində yaşıllaşdırma işlər aparmışlar. Aksiya zamanı Sahil, Ümid, Qobustan, Ələt qəsəbələri, Heydər Əliyev adına Dərin Özüllər Zavodu və Qaz Emalı Zavodunun ərazilərində badam, zeytun, söyüd, və digər ağac tingləri əkilmişdir. Bu iş Bakı - Salyan avtomobil yolunun 18, 19 və 55-ci kilometrliyində də davam etdirilmişdir.
Yaşıllaşdırma işlərinə su maşınları və müxtəlif növ texnika cəlb edilmişdir. Yaşıllıqların suvarılması üçün əraziyə su xətləri çəkilmişdir. Ağacların əkiləcəyi ərazilərdə torpağın münbitləşdirilməsi istiqamətində müvafiq işlər də görülmüşdür. Ekoloji vəziyyətin sağlamlaşdırılması yönümündə həyata keçirilən belə tədbirlər mayın sonlarına qədər davam edəcəkdir. Qaradağ Rayon İcra Hakimiyyətinin başçısı Süleyman Mikayılovun da iştirak etdiyi tədbirdə ümumilikdə iki minədək ağac əkilmişdir.
X X X
Suraxanı rayonu. Ətraf mühitin sağlamlaşdırılması, paytaxtın yaşıllıqlar diyarına çevrilməsi naminə aparılan işlərin əhəmiyyəti Suraxanı rayonunda da yüksək qiymətləndirilir. Rayon sakinləri bu xeyirxah təşəbbüsdə fəal iştirak edirlər. Ölkəmizin başçısının paytaxtın ekoloji durumuna müsbət təsir göstərən yaşıllıqların artırılması və ağacların əkilməsi ilə bağlı verdiyi tövsiyələri rayonda artıq öz bəhrəsini verir. Heydər Əliyev prospekti, Yeni Suraxanı qəsəbəsi yaxınlığında, əvvəlki Binə Ticarət Mərkəzinin yerində 8 hektar ərazidə ağacəkmə, yaşıllaşdırma və abadlıq işləri aparılmışdır. Tədbirdə rayon icra hakimiyyətinin başçısı İlqar Abbasov, idarə, müəssisə, təşkilatların nümayəndələri iştirak etmişlər. Rayon mənzil kommunal təsərrüfat birliyi, eləcə də yaşıllaşdırma idarəsinin əməkçiləri suvarma və qulluq işlərini mütəmadi olaraq aparacaqlar.
Heydər Əliyev prospekti, Yeni Suraxanı qəsəbəsi yaxınlığında “Badam bağı”nda 4 mindən çox ağac əkilmişdir.