Ekoloji qanunvericiliyin tələblərini pozanlar cərimələnmişlər
Bakı, 7 sentyabr (AZƏRTAC). Ekologiya və Təbii Sərvətlər Nazirliyinin Ətraf Mühitin Mühafizəsi Departamenti tərəfindən ekoloji qanunvericiliyin tələblərinə riayət olunması vəziyyəti araşdırılmışdır.
Nazirliyin mətbuat xidmətindən AZƏRTAC-a bildirmişlər ki, avqustun 15-dən 31-dək aparılmış araşdırma zamanı su və torpaq ehtiyatlarının, atmosfer havasının, yerin təkinin, fauna və floranın mühafizəsi, o cümlədən ətraf mühitə qanunsuz məişət və istehsalat tullantılarının yerləşdirilməsi ilə bağlı bir sıra qanun pozuntuları aşkar edilmişdir. Yol verilmiş pozuntulara görə 129 akt və protokol tərtib olunmuş, nöqsanların aradan qaldırılması üçün 39 müddətli məcburi göstəriş verilmişdir.
Ümumilikdə 1 milyon 738 min 632 manat məbləğində cərimə tətbiq edilmiş, ətraf mühitə dəymiş ziyana görə 1198.54 manat məbləğində iddia qaldırılmış, ətraf mühitə tullantıların atılmasına və axıdılmasına görə hüquqi və fiziki şəxslərə 26 min 413.08 manat məbləğində ödəmə tətbiq edilmişdir.
Tədbir görülməsi üçün hüquq-mühafizə orqanlarına 8, icra qurumlarına isə 14 iş göndərilmişdir.
Bölmənin digər xəbərləri
