EKOLOQLAR SUMQAYITDA ƏTRAF MÜHİTİN ÇİRKLƏNMƏSİ FAKTLARINI AŞKAR ETMİŞLƏR
Nazirliyin mətbuat xidmətindən AZƏRTAC-ın müxbirinə bildirmişlər ki, uzun illərdən sonra yenidən fəaliyyətə başlamış alüminium istehsalatı köhnə avadanlıqla təchiz edilmiş, qaz-tozyığan qurğusuz işə salınmışdır ki, bu da çoxlu ftor birləşmələrinin atmosferə buraxılmasına səbəb olmuşdur. Müəssisənin ərazisində bu maddənin səviyyəsi sanitariya normalarından 10 dəfə, ətrafda isə 3-4 dəfə çoxdur. Əlverişsiz hava şəraitində çirklənmənin səviyyəsi daha da artır. Nazirliyin əməkdaşlarının apardıqları tədqiqatlar nəticəsində məlum olmuşdur ki, Sumqayıtda atmosferin çirklənməsinin 71,9 faizi bu müəssisənin payına düşür. Ekoloji qanunvericiliyi pozduğuna görə müəssisəyə qarşı iddia irəli sürülmüşdür.
Səthi aktiv maddələr zavodunda civə tətbiq olunmaqla xlor istehsalının qəza vəziyyətində olan texnologiyasından hələ də istifadə edilməsi ekoloqlarda narahatlıq doğurmuşdur. Civə şlamının saxlanması üçün xüsusi poliqonun istifadəyə verilməsinə baxmayaraq, hazırda müəssisənin anbarlarında insan orqanizmi üçün təhlükəli olan bu birləşmə çoxlu miqdarda yığılıb qalmışdır və vəsait çatışmadığına görə poliqona aparılmır. Şəhərin ən iri “Etilen-polietilen” və “Sintez-kauçuk” zavodlarında texnoloji rejim normalarına riayət olunmadığından Xəzərə axıdılan sənaye çirkablarında neft məhsullarının və digər kimyəvi elementlərin səviyyəsi yolverilən normalardan artıqdır.
Nazirliyin mütəxəssisləri Sumqayıtın çirkli suları idarəetmə sisteminin qeyri-qənaətbəxş vəziyyətdə olduğunu da aşkara çıxarmışlar. Hər gün Xəzərə 25 min kubmetr çirkab axıdılır.
