Ekspert: Laçın üzərində nəzarətin təmin olunması Qarabağda separatizmin kökünün kəsilməsində mühüm amillərdən olub
Bakı, 26 avqust, AZƏRTAC
Silahlı Qüvvələrimizin Laçın üzərində nəzarəti tam təmin etməsi Qarabağda separatizmin sonlandırılmasının əsas mərhələlərindən biri oldu.
Bunu AZƏRTAC-a açıqlamasında Xəzər Müdafiə Tədqiqatları Mərkəzinin rəhbəri, hərbi ekspert Ramil Məmmədli deyib.
O bildirib ki, 1988-ci ildən etibarən Qarabağda separatizmin başlanması, Ermənistanın Azərbaycana qarşı ərazi iddiaları və işğalçılıq siyasəti fonunda Laçının strateji əhəmiyyəti daha da artıb. Lakin həmin dövrdə Azərbaycanın rəhbərliyi Laçının müdafiəsi və təhlükəsizliyinin təmin olunması istiqamətində zəruri və köklü tədbirlər həyata keçirə bilməyib. Nəticədə Laçın işğala məruz qalıb.
Ekspertin sözlərinə görə, Vətən müharibəsi zamanı Azərbaycan Ordusunun həyata keçirdiyi uğurlu əməliyyatlar və əldə etdiyi Şanlı Zəfər nəticəsində Laçının işğaldan azad olunması üçün tarixi imkan yaranıb. 10 noyabr 2020-ci il tarixli üçtərəfli Bəyanatın imzalanması ilə Ermənistan silahlı qüvvələri Laçın rayonunu tərk etməyə məcbur edilib.
“Vətən müharibəsi başa çatdıqdan sonra da Laçının strateji əhəmiyyəti özünü göstərirdi. Qarabağdakı separatçı qüvvələrin Ermənistanla əlaqəsinin təmin olunmasında Laçın istiqaməti mühüm rol oynayırdı. Azərbaycan dövlətinin həyata keçirdiyi tədbirlər nəticəsində isə bu ərazidə təhlükəsizlik təmin edildi və separatizmin mövcudluğuna son qoyulması istiqamətində mühüm addımlar atıldı”, - deyə R.Məmmədli vurğulayıb.
O qeyd edib ki, Laçın üzərində Azərbaycanın nəzarətinin təmin olunması Qarabağda separatizmin kökünün kəsilməsi baxımından mühüm amillərdən biri olub. Şuşanın və Laçının azad edilməsi Azərbaycanın hərbi-siyasi qələbəsinin mühüm mərhələlərini təşkil edib.
“Otuz il ərzində Laçın Azərbaycan üçün həm hərbi-taktiki və hərbi-strateji, həm də mənəvi baxımdan böyük əhəmiyyət daşıyıb. Laçın bu gün də öz strateji əhəmiyyətini qoruyur. Azərbaycan dövləti şəhərin inkişafı, burada müasir və dayanıqlı, o cümlədən iqtisadi infrastrukturun yaradılması istiqamətində mühüm layihələr həyata keçirir”, - deyə hərbi ekspert əlavə edib.
Qeyd edək ki, 2022-ci il avqustun 26-da Azərbaycan Ordusu Laçın şəhərinə yerləşib, Zabux və Sus kəndləri nəzarətə götürülüb. Bununla da mühüm strateji əhəmiyyətə malik Laçın diyarının işğalına tamamilə son qoyulub. Prezident İlham Əliyevin 2023-cü il iyulun 31-də imzaladığı Sərəncama əsasən, avqustun 26-sı Laçın Şəhəri Günü kimi qeyd olunur.
Müxbir - Göyçək Mahmudlu
Bölmənin digər xəbərləri
