Ekspert: Metroda təmir işləri avtobus şəbəkəsinin gücləndirilməsini zəruri edir
Bakı, 1 sentyabr, AZƏRTAC
Metro Bakı şəhərində sərnişindaşımanın əsas elementlərindən biridir və ona alternativ nəqliyyat imkanlarının yaradılması xüsusilə stansiyaların təmirə bağlandığı dövrdə mühüm əhəmiyyət daşıyır.
Bu sözləri AZƏRTAC-a açıqlamasında nəqliyyat üzrə ekspert Aslan Əsədov bildirib.
Onun sözlərinə görə, ekspres avtobusların təşkili metro xətlərinin müəyyən hissələrində yaranan nəqliyyat ehtiyacının qarşılanmasına imkan verir.
“Avtobusların qısa və ya uzun məsafələr üzrə iki nöqtəni birləşdirən, xüsusilə ekspres marşrutlar kimi müəyyənləşdirilməsi metroda təmir işləri zamanı alternativ xətlərdən istifadəyə dair yeni konsepsiyanın hazırlanması deməkdir. Hazırda təşkil edilən ekspres marşrutlar sərnişinlərin alternativ nəqliyyat vasitələrinə real tələbatının olduğunu göstərir. Əvvəllər bəzi istiqamətlər üzrə belə marşrutlara ehtiyacın olub-olmaması sual doğura bilərdi, lakin metro stansiyalarının təmirə bağlanması bu tələbatı daha aydın şəkildə ortaya çıxarıb”, - deyə ekspert qeyd edib.
Aslan Əsədov hesab edir ki, qarşıdan gələn tədris ili ilə əlaqədar sərnişin axınının artması alternativ avtobus daşımalarına olan tələbatı da yüksəldə bilər: “Məktəblərin və universitetlərin açılması ilə əlaqədar yeni avtobus xətlərinin təşkilinə və mövcud xətlərin gücləndirilməsinə ehtiyac yarana bilər. Hazırda marşrut şəbəkəsi kifayət qədər görünə bilər, lakin sentyabr, noyabr, dekabr və ümumilikdə payız-qış aylarında daha ağır nəqliyyat qrafikləri fonunda əlavə ehtiyaclar özünü göstərə bilər”.
Qeyd edək ki, hazırda ekspres marşrutlardan sərnişinlər fəal istifadə edirlər. Ümumilikdə gücləndirmə aparılmış 34 marşrut xəttinə 140-dan çox əlavə avtobus cəlb olunub. Təkcə 6 ekspres marşrut üzrə gündəlik 95 nəqliyyat vasitəsi ilə 68 minədək sərnişin daşınır.
28 müntəzəm marşrut üzrə də avtobusların sayı artırılıb. Bunun nəticəsində avtobuslararası interval azaldılıb. Dəstəkləyici tədbirlər çərçivəsində gücləndirilmiş 34 marşrut xətti üzrə gün ərzində 475 min sərnişinə xidmət göstərilir. Eyni zamanda, avtobusların hərəkətinə real vaxt rejimində nəzarət edilir, sərnişin axını təhlil olunur və tələbatdan asılı olaraq xəttə buraxılan avtobusların sayı operativ şəkildə tənzimlənir. Sərnişinlər ekspres marşrutlar barədə məlumatı “AYNA MaaS” tətbiqi vasitəsilə də əldə edə bilərlər.
Bölmənin digər xəbərləri
