Ekvador Latın Amerikasında COVID-19-dan ən çox zərər çəkən ölkədir
Madrid, 20 aprel, AZƏRTAC
Ekvador hökumətinin məlumatına görə, ölkədə koronavirusa 9 468 yoluxma, 474-dən çox ölüm halı qeydə alınıb. Ekvadorda ilk yoluxma halı fevralın 29-da İspaniyadan gələn qadında aşkarlanıb.
AZƏRTAC xəbər verir ki, əhalinin ən sıx məskunlaşdığı böyük liman şəhəri Quayakil epidemiyanın yayılma mərkəzinə çevrilib. Ölkədəki yoluxma hallarının 70 faizi bu şəhərin payına düşür.
Pandemiya əhalinin ən yoxsul təbəqəsinə daha güclü təsir göstərir. Hökumət 17 milyard dollarlıq borc üzrə defoltun elan olunması məsələsini nəzərdən keçirir. Habelə neft qiymətlərinin aşağı olması və bütün turizm sektorunun ən azı altı aya qədər dondurulması Ekvadorun ödəmə qabiliyyətinin artmasına imkan vermir.
Tibb işçiləri həddindən artıq yüklənmiş səhiyyə sistemi və zəif xəstəxana infrastrukturu ilə koronavirusun yayılmasının öhdəsindən gələ bilmirlər. Dərman preparatlarının və tibbi ləvazimatların çatışmaması onların işini daha da çətinləşdirir.
Qeyd edək ki, martın 17-dən etibarən Ekvadorda komendant saatı elan edilib.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
