ƏLİL İNSANLARIN CƏMİYYƏTƏ İNTEQRASİYASI GÜCLƏNDİRİLİR
Gözdən Əlillər Cəmiyyətinin prezidenti (GƏC) Səmiyar Abdullayev AZƏRTAC-a bildirmişdir ki, ölkəmizdə bu kateqoriyadan olan insanlar üçün geniş imkanlar yaradılmaqdadır. Bundan sonra fiziki cəhətdən qüsurlu insanların cəmiyyətə inteqrasiyası gücləndiriləcəkdir. Artıq bu istiqamətdə ilk addımlar atılmış, gözdən əlil insanların məşğulluq probleminin həlli üçün xüsusi kurslar təşkil edilmişdir.
S.Abdullayev demişdir ki, bu işin davamı kimi rabitəçi operator hazırlayacaq kurslara sənəd qəbuluna başlanmışdır və təlimlərin keçirilməsi üçün xüsusi bina ayrılmışdır. Hazırda həmin binada son tamamlama işləri aparılır. Müasir avadanlıqla təchiz olunmuş bina sentyabarın əvvəlində tam hazır olacaqdır. Sentyabrın 15-də isə kurslar başlayacaqdır. Dərslər səsli proqramlarla keçiriləcəkdir.
GƏC-in prezidenti demişdir ki, gözdən əlil insanlar üçün yaradılan imkanlar bununla bitmir. Səhiyyə Nazirliyinin dəstəyi ilə fiziki cəhətdən qüsurlu insanlar üçün masaj kurslarına də sənəd qəbulu elan edilmişdir. Artıq ikinci dəfə baş tutacaq kurslar 1 il 6 ay davam edəcəkdir. Məzunlar işlə də təmin olunacaqlar. Yaxın vaxtlarda isə gözdən əlil insanlar üçün yeni reabilitasiya mərkəzi inşa ediləcəkdir. Mərkəzdə regionlardan gələn əlillərə hər cür şərait yaradılacaqdır.
