Elm sahəsində dövlət siyasəti muxtar respublikada uğurlu nəticələrə yol açıb
Naxçıvan, 29 mart, AZƏRTAC
Dövlətimizin başçısı İlham Əliyevin 2018-ci il 9 aprel tarixli Sərəncamı ilə Azərbaycanda “Elm Günü”nün təsis edilməsi bütövlükdə Azərbaycan elminə, elmi ictimaiyyətinə göstərilən diqqət və qayğının göstəricisidir.
AMEA Naxçıvan Bölməsinin mətbuat xidmətindən AZƏRTAC-ın Naxçıvan bürosuna bildirilib ki, bu sözləri Elm Gününə həsr olunmuş tədbirdə Naxçıvan Bölməsinin sədri, akademik İsmayıl Hacıyev deyib. Alim Vətən müharibəsində ölkəmizin qazandığı parlaq zəfərdən danışaraq qeyd edib ki, bu tarixi qələbə qəhrəman oğullarımızın mərdliyi, şücaəti ilə yanaşı, həm də hərbi-elmi yeniliklərin tətbiqi ilə əlamətdardır.
“Ölkənin ən böyük elm məbədi - Azərbaycan Milli Elmlər Akademiyası yaradıldığı gündən etibarən milli elmin baş qərargahı rolunu uğurla davam etdirməkdədir”, - deyən akademik elmin önəmindən, cəmiyyətin elmlə paralel inkişafından bəhs edib.
“Naxçıvan Muxtar Respublikasında elmin inkişafı” mövzusunda məruzəsində İsmayıl Hacıyev xalqımızın zəngin elmi dünyagörüşünə, tarixi keçmişinə qısa nəzər salıb, Naxçıvan torpağının dünya elminə bəxş etdiyi alim və mütəfəkkirlərdən bəhs edib. Naxçıvanşünaslığın keçdiyi zəngin inkişaf yoluna nəzər salan akademik bildirib ki, ulu öndər Heydər Əliyev respublikamıza rəhbərliyinin birinci dövründən başlayaraq daim elmə qayğı göstərib, elmin inkişafı üçün məqsədyönlü və uzaqgörən addımlar atıb. Məhz dahi liderin təşəbbüsü ilə AMEA-nın Naxçıvan Regional Elm Mərkəzi yaradılıb, Naxçıvanın təbii xammal ehtiyatlarının kompleks şəkildə öyrənilməsi, səmərəli istifadəsi, muxtar respublikanın sosial-iqtisadi tarixinin, arxeoloji, epiqrafik, etnoqrafik abidələrinin, folklorunun öyrənilməsi istiqamətində tədqiqatlar aparılıb. Ulu Öndərin elm siyasəti Naxçıvan Muxtar Respublikasında uğurla davam etdirilib, elmin inkişafı üçün imzalanan qərar və sərəncamların, qəbul olunmuş proqramların icrası istiqamətində mühüm tədbirlər həyata keçirilib. Yaranmış əlverişli şəraitdən istifadə edən muxtar respublika ziyalıları Naxçıvan Muxtar Respublikası Ali Məclisi Sədrinin sərəncamı və dəstəyi ilə bir sıra mühüm əhəmiyyətə malik beynəlxalq simpoziumların keçirilməsinə müvəffəq olublar. Qeyd edilən beynəlxalq tədbirlər Naxçıvanda elmin hərtərəfli inkişafına təkan verib, inkişafın bütün mərhələlərinin elmi əsaslar üzrə işlənib hazırlanmasına əsaslı təsir göstərib.
Ümummilli lider Heydər Əliyevin 2002-ci il 7 avqust tarixli Sərəncamı ilə Azərbaycan Milli Elmlər Akademiyasının Naxçıvan Bölməsinin yaradılmasından bəhs edən alim bölmənin fəaliyyəti dövründə qazanılan elmi nailiyyətlər haqqında danışıb. Vurğulayıb ki, bu tarixi sərəncamla Naxçıvanın tarixinin, arxeologiyasının, mədəni mühitinin, folklorunun, flora və faunasının, təbii ehtiyatlarının araşdırılması və əldə olunan mühüm nəticələrin nəşr edilməsi sahəsində elmi uğurlar qazanılıb. Aparılan elmi-tədqiqat işlərinin 174 mühüm nəticəsi AMEA-nın illik hesabatlarına daxil edilib, bölmənin fəaliyyəti dövründə 2 cilddə “Naxçıvan Ensiklopediyası”, “Naxçıvan Abidələri Ensiklopediyası”, “Naxçıvan tarixi atlası”, 3 cilddə “Naxçıvan tarixi”, “Naxçıvan teatrının salnaməsi”, 3 cilddə “Naxçıvanın folkloru antologiyası”, “Dədə Qorqud yurdu-Naxçıvan” tarixi-coğrafi və etnoqrafik atlası, “Naxçıvan Muxtar Respublikasının təbii sərvətləri: hazırkı vəziyyət və perspektivlər”, 2 cilddə Naxçıvan Muxtar Respublikasının “Qırmızı kitabı”, “Naxçıvan Muxtar Respublikasının ampeloqrafiyası”, “Naxçıvan Muxtar Respublikasının dərman bitkiləri”, “Naxçıvan Muxtar Respublikasının fövqəladə hallar atlası”, 2 cilddə “Naxçıvan coğrafiyası” kimi fundamental nəşrlər işıq üzü görüb. Bölmə əməkdaşları tərəfindən muxtar respublikada yerləşən 1200-dən çox tarix və mədəniyyət abidəsi aşkar olunub və pasportlaşdırılıb. Vikipediya açıq dünya ensiklopediyasında ingilis və rusdilli səhifələrdə Naxçıvan tarixi ilə bağlı erməni iddialarını əks etdirən məqalələrin redaktəsi həyata keçirilib, Azərbaycandilli Vikipediya ensiklopediyasında redaktələrlə yanaşı, Naxçıvanın tarixi, mədəniyyəti, təbii sərvətləri ilə bağlı 232 yeni məqalə yerləşdirilib.
Akademik həmçinin məruzəsində muxtar respublika alimlərinin aldığı patentlər, qalib olduqları qrant layihələr, elmin istehsalata tətbiqi əsasında hazırlanan məhsullar, elm və ali təhsil müəssisələrinin beynəlxalq əlaqələrindən danışıb.
Naxçıvan Muxtar Respublikası Ali Məclisi Sədrinin elmə göstərdiyi diqqət və qayğıdan bəhs edən alim bildirib ki, 2014-cü ildə Naxçıvan Muxtar Respublikası Ali Məclisinin Sədri yanında Bilik Fondunun, elm, texnika, memarlıq, mədəniyyət və ədəbiyyat üzrə Naxçıvan Muxtar Respublika mükafatlarının təsis edilməsi, 2019-cu ildə Naxçıvan Muxtar Respublikası Ali Məclisinin Sədri yanında Elmin İnkişafı Fondunun yaradılması Naxçıvan Muxtar Respublikası Ali Məclisi Sədrinin elm və təhsilin inkişafına yüksək münasibəti və bu istiqamətdə regionda dövlət siyasətinin uğurla həyata keçirilməsini ifadə edir.
Sonda akademik İsmayıl Hacıyev muxtar respublikada elmin inkişafına göstərdiyi diqqət və qayğıya görə Naxçıvan ziyalıları adından Naxçıvan Muxtar Respublikası Ali Məclisinin Sədri Vasif Talıbova minnətdarlığını bildirib.
Yığıncaqda Naxçıvan Dövlət Universitetinin rektoru, tarix üzrə fəlsəfə doktoru, dosent Elbrus İsayev, AMEA Naxçıvan Bölməsinin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Hacıfəxrəddin Səfərli, Naxçıvan Müəllimlər İnstitutunun rektoru, pedaqogika üzrə fəlsəfə doktoru, dosent Azad Novruzov və “Naxçıvan” Universitetinin rektoru, filologiya üzrə fəlsəfə doktoru, dosent Nurlana Əliyeva çıxış ediblər.
Bölmənin digər xəbərləri
