ELMİ-PRAKTİK KONFRANS KEÇİRİLMİŞDİR
Konfransda agentliyin sədri Kamran İmanov məruzə etmişdir.
Qeyd olunan günlərlə əlaqədar respublikamızda agentliyin hər il silsilə tədbirlər, müvafiq dövlət və qeyri-hökumət qurumları ilə birgə konfrans keçirildiyini vurğulayan natiq həmin toplantıların müsbət nəticələrindən danışmışdır. O bildirmişdir ki, xalqımızın ümummilli lideri Heydər Əliyevin təşəbbüsü və daimi dəstəyi ilə yaradılmış milli Müəllif Hüquqları Agentliyinin artıq on illik tarixi vardır. Ötən müddətdə ən böyük nailiyyətlərdən biri Azərbaycanda qurumun keçmiş sovet dövrü də daxil edilməklə ilk “Müəlliflik hüququ və əlaqəli hüquqlar haqqında” Qanunun qəbul olunmasıdır. Bundan əlavə, bir sıra qanunlar da qəbul edilmişdir ki, onların hər biri agentliyin fəaliyyətində müsbət rol oynamışdır.
Konfransda agentliyin həyata keçirdiyi tədbirlərdən ətraflı danışılmışdır. Qeyd olunmuşdur ki, təkcə 2004-cü ilin birinci rübündə müəllif hüquqları məsələləri ilə bağlı agentliyə müraciət edən 50 nəfərə müvafiq izahatlar verilmişdir. Ötən il qonorar hesablanmış müəlliflərin sayı 2644-ə çatmış, ölkəmizdə əsərlərdən istifadəyə görə agentliyin əhatə etdiyi təşkilatlardan müəlliflər üçün 249,8 milyon manat qonorar yığılmışdır.
Məruzə ətrafında müzakirələrdə agentliyin fəaliyyətindən, beynəlxalq təşkilat və qurumlarla əlaqəsindən söz açılmış, maraqlı təkliflər irəli sürülmüşdür.
Konfransda kütləvi informasiya vasitələri nümayəndələrini maraqlandıran suallara cavab verilmişdir.
