Elmir Babayev: Fundamental tədqiqatlar Azərbaycan haqqında elmi biliklərin beynəlxalq səviyyədə yayılmasına xidmət edir
Bakı, 21 iyul, AZƏRTAC
Müasir dünyada dövlətlərin beynəlxalq nüfuzu yalnız iqtisadi və siyasi imkanlarla deyil, həm də elm, təhsil, mədəniyyət və intellektual resurslarla müəyyən olunur. Elmi nailiyyətlərin, tarixi-mədəni irsin və innovativ ideyaların beynəlxalq səviyyədə təqdim edilməsi ölkələrin yumşaq güc imkanlarını artıran əsas amillərdən biridir. Bu baxımdan elmlər akademiyaları milli elmi potensialın inkişafı, bilik mübadiləsinin təşkili və ölkələrin qlobal elmi məkanda mövqeyinin möhkəmləndirilməsi baxımından strateji əhəmiyyət daşıyır.
Bu fikirləri AZƏRTAC-a açıqlamasında AMEA Gənclər Akademiyasının sədri kimya üzrə fəlsəfə doktoru, dosent Elmir Babayev bildirib.
Elmir Babayev bildirib ki, müasir beynəlxalq münasibətlər sistemində dövlətlərin təsir imkanları yalnız iqtisadi və hərbi güclə deyil, həm də elm, təhsil, mədəniyyət və intellektual potensialla müəyyən olunur. ABŞ alimi Cozef Nayın irəli sürdüyü “yumşaq güc” konsepsiyasına əsasən, dövlətlər cəlbetmə və nüfuz yaratma vasitələri ilə beynəlxalq mövqelərini gücləndirirlər. Azərbaycan Milli Elmlər Akademiyası da bu istiqamətdə həyata keçirdiyi fəaliyyətlə ölkənin elmi nüfuzunun artırılmasına, zəngin tarixi-mədəni irsinin beynəlxalq elmi ictimaiyyətə çatdırılmasına və elmi diplomatiyanın inkişafına mühüm töhfələr verir. Bu baxımdan elmlər akademiyaları ölkələrin yumşaq güc imkanlarının mühüm tərkib hissəsidir: “Akademiyalar milli elmi nailiyyətləri nümayiş etdirir, tarixi-mədəni irsi araşdırır və ölkənin beynəlxalq elmi ictimaiyyətlə əlaqələrinin inkişafına mühüm töhfə verir”.
Gənc alim qeyd edib ki, AMEA-nın elmi müəssisələrində tarix, arxeologiya, dilçilik, ədəbiyyatşünaslıq, şərqşünaslıq və digər istiqamətlərdə aparılan fundamental tədqiqatlar Azərbaycan haqqında elmi biliklərin formalaşdırılmasına və beynəlxalq səviyyədə yayılmasına xidmət edir.
“Qarabağın tarixi və etnomədəni irsinin öyrənilməsi, Azərbaycan muğamı, aşıq sənəti, xalçaçılıq ənənələri, qədim əlyazmalar və milli dil resursları ilə bağlı araşdırmalar Azərbaycanın zəngin mədəni irsinin elmi əsaslarla təqdim olunmasında mühüm rol oynayır. Bu fəaliyyət həm də milli yaddaşın qorunmasına və ölkəmizin mədəni diplomatiyasının gücləndirilməsinə xidmət edir”, – deyə Elmir Babayev bildirib.
Gənclər Akademiyasının sədri vurğulayıb ki, müasir dünyada elmi nəşrlər, beynəlxalq konfranslar, tədqiqat layihələri və akademik əməkdaşlıqlar ölkələrin intellektual təsir imkanlarını artıran əsas vasitələrdəndir. Bu baxımdan elmlər akademiyaları dövlətlərin “intellektual səfirlikləri” kimi çıxış edir. AMEA-da son illərdə elmmetriya, nəşriyyat fəaliyyəti və elmi kommunikasiyalar sahəsində həyata keçirilən islahatlar Akademiyanın beynəlxalq nüfuzunun yüksəldilməsinə xidmət edir. Elmi jurnalların beynəlxalq standartlara uyğunlaşdırılması, nüfuzlu elmi bazalara inteqrasiya, beynəlxalq nəşriyyatlarla əməkdaşlığın genişləndirilməsi və rəqəmsal qiymətləndirmə mexanizmlərinin tətbiqi Azərbaycan elminin qlobal elmi məkandakı mövqeyini daha da möhkəmləndirir.
Bölmənin digər xəbərləri
