Elnur Nəsibov: “Gənc qızların təhsilinə dəstək” layihəsində benefisiar sayı 315 nəfərə çatdırılacaq
Bakı, 14 oktyabr, AZƏRTAC
“Gənc qızların təhsilinə dəstək” layihəsi çərçivəsində onlar təkcə təqaüd deyil, həm də təcrübə və təlim proqramlarından faydalanmaq imkanı qazanırlar. Həyata keçirilən proqramlarda iştirak edən qızlardan bir neçəsi artıq işlə təmin edilib. Ümumilikdə 4 belə proqram reallaşdırılıb. Proqramlarda iştirak edənlərdən 5 nəfəri şəhid xanımıdır.
AZƏRTAC xəbər verir ki, bunu Təhsilin İnkişafı Fondunun İdarə Heyətinin sədri Elnur Nəsibov “Gənc qızların təhsilinə dəstək” layihəsi çərçivəsində keçirilən tədbirdə çıxışı zamanı deyib.
Fondun rəhbəri bildirib ki, bu layihədə benefisiar sayı 315 nəfərə çatdırılacaq: “Layihə çərçivəsində “Paria” təqaüd və inkişaf proqramı həyata keçirilib və həmin proqrama 1800-ə yaxın müraciət olub. “Zərif mühəndislər” təqaüd proqramına isə 215 qız cəlb edilib.
Digər uğurlu layihələrimiz “Maya Hacıyeva adına İKT bacarıqları təqaüd proqramı və “Hənifə Məlikova - Zərdabi adına təqaüd proqramı” olub. Bu il ali məktəblərə qəbul imtahanlarında yüksək bal toplayan aztəminatlı ailələrdən olan 131 tələbə qıza təqaüd verilib”.
Elnur Nəsibov xatırladıb ki, 2024-2025-ci tədris ili üçün mövcud təqaüd proqramlarına qeydiyyat davam edir. Proqrama müraciətlər oktyabrın 20-dək qəbul olunacaq.
Bölmənin digər xəbərləri
