ƏMƏKDAŞLIQ TARİXİNDƏ GÖRKƏMLİ HADİSƏ
HEYDƏR ƏLİYEVƏ SENATIN FƏXRİ MEDALI TƏQDİM OLUNDU
Azərbaycan dövlətinin başçısı Heydər Əliyev ilə Rene Monari arasında söhbət zamanı respublikamızda ictimai-siyasi vəziyyət, müharibənin gedişi, ölkələrimizin əməkdaşlığını genişləndirmək imkanları, parlamentlərarası əlaqələr qurulması barədə fikir mübadiləsi aparıldı. Fransa senatının başçısı Ermənistanın Azərbaycana təcavüzü nəticəsində ərazilərimizin işğal olunması, qaçqınların problemləri və digər məsələlərə böyük maraq göstərdi. Hər iki tərəfi maraqlandıran başqa məsələlər də müzakirə oldundu.
Görüşdən sonra Rene Monari üzərində Heydər Əliyevin ad-familiyası yazılmış senatın fəxri medalını Azərbaycan Prezidentinə təqdim etdi. Daha sonra Heydər Əliyev senatın fəxri qonaqlar üçün Qızıl kitabına avtoqraf yazdı. Respublika Prezidenti Fransa senatının sədrinə əl ilə toxunmuş nəfis Azərbaycan xalçası bağışladı.
Heydər Əliyev və onu müşayiət edən şəxslər Lüksemburq sarayını gəzdilər. Azərbaycan Prezidenti I Napoleonun ilk dəfə iclas keçirdiyi salonda oldu, senatın kitabxanasına baxdı. Azərbaycanlı qonaqlar hazırda senatın iclaslarının keçirildiyi salona maraqla tamaşa etdilər. Burada Heydər Əliyevə senatın fəaliyyəti barədə hərtərəfli məlumat verildi. Qeyd edildi ki, Fransa parlamenti iki palatadan - Milli Məclis və senatdan ibarətdir. Senatın üzvləri 9 il müddətinə seçilir. Hər üç ildən bir onun tərkibinin üçdə bir hissəsi təzələnir. Senatın 22 nəfərdən ibarət rəhbər orqanı - bürosu vardır. Senatın tərkibinə müxtəlif peşə adamlarının seçilməsinə diqqət yetirilir.
Dekabrın 22-də səhər Azərbaycan Prezidenti öz iqamətgahında Fransanın “Tomson” firmasının prezidenti Filipp Jiskar d’Esteni qəbul etdi. Fransada məşhur iş adamı kimi tanınan və dünyanın əksər ölkələri ilə sıx əlaqələri olan Filipp Jiskar d’Esten Fransanın keçmiş Prezidentinin əmisi oğludur.
Söhbət zaman bu firma ilə Azərbaycan arasında əlaqələr qurulması imkanları nəzərdən keçirildi və qeyd edildi ki, respublikamızda hər bir xarici firmanın fəaliyyəti üçün geniş şərait vardır və Azərbaycan dövləti ölkəmizə qoyulan investisiyalara tam təminat verir.
Həmin gün Heydər Əliyev Fransının humanitar məsələlər üzrə naziri xanım Mişo Şevrini də qəbul etdi. Görüş zamanı iki ölkə arasında humanitar sahələrdə əməkdaşlığın möhkəmləndirilməsi imkanları hərtərəfli müzakirə olundu. Fransa və Azərbaycan elm, mədəniyyət, incəsənət adamlarının qədim əlaqələrinin bərpa və inkişaf etdirilməsi zərurliliyinə toxunuldu. Söhbətdə ölkələrimiz arasında humanitar sahələrdə əməkdaşlıq üçün qarşılıqlı konkret addımlar atılması barədə müəyyən razılıqlar əldə edildi.
Azərbaycan Prezidenti Heydər Əliyev dekabrın 21-də axşamdan xeyli keçmiş Fransanın məşhur TV-5 kanalı ilə çıxış etdi. Bu kanalın verilişləri Avropanın əksər ölkələrinə yayılır (Respublika televiziyası çıxışı operativ translyasiya etdiyi üçün AZƏRTAC həmin müsahibəyə geniş yer ayırmadı).
İQTİSADİ ƏMƏKDAŞLIĞI HAQQINDA
Dekabrın 22-də “Fiqaro” qəzeti “Dünya ölkələrinin iqtisadi həyatı” bölməsində Azərbaycan dövlət başçısı Heydər Əliyevin Fransaya səfəri barədə yazı dərc etmişdir. Bu materialda Fransa Milli Sahibkarlar Mərkəzində Azərbaycan rəhbəri ilə keçirilmiş görüşdən də geniş bəhs olunur. Qəzet yazır ki, Heydər Əliyev fransız sənayeçilərini öz ölkəsinə, xüsusilə neft sənayesinə və kənd təsərrüfatı bölməsinə investisiya qoymağa çağıraraq demişdir: “Mən Fransanın işgüzar adamlarını Azərbaycana dəvət edirəm”.
Qəzet daha sonra yazır ki, indi Azərbaycan dünyanın iki neft şirkəti ilə neft yataqlarının kəşfiyyatı və birgə istismarı barədə danışıqlar aparır. Heydər Əliyev qeyd etmişdir ki, burada fransızlar üçün də yer tapılacaq. O, fransız sahibkarlarını sakitləşdirərək demişdir: “Ola bilsin ki, əvvəllər sizin problemləriniz olub. Mən cəmi altı aydır ki, bu vəzifədəyəm, bundan sonra xarici investisiyalara dövlət təminatı olacaqdır”.
Aslan Aslanov
AZƏRTAC-ın xüsusi müxbiri
Paris
Bölmənin digər xəbərləri
