Endi Börnhem sosial qayğı sistemində geniş islahatlara start verir
London, 29 iyul, AZƏRTAC
Böyük Britaniyanın Baş naziri Endi Börnhem hakimiyyətə gəldikdən sonra bu gün hökumətin siyasəti ilə bağlı ilk böyük siyasi çıxışını edəcək.
AZƏRTAC xəbər verir ki, o, çıxışında yaşlılar və əlillər üçün sosial qayğı sisteminin islahatı ilə bağlı planlarını və bu sahədə digər siyasi partiyalarla əməkdaşlıq niyyətini açıqlayacaq. Ötən həftə Baş nazir vəzifəsinə başlayan E.Börnhem yaşayış xərclərinin azaldılmasına yönəlmiş bir sıra tədbirlər elan etdikdən sonra Leyboristlər Partiyasının reytinqində artım müşahidə olunub. Baş nazirin ofisi müxalifətdəki Mühafizəkarlar və Liberal Demokratlar partiyalarının liderlərinin də sosial qayğı islahatlarını müzakirə etmək üçün görüşə dəvət olunduğunu açıqlayıb.
Böyük Britaniyada Milli Səhiyyə Xidmətindən fərqli olaraq, sosial qayğı xidmətləri əksər vətəndaşlar üçün ödənişsiz deyil. Britaniyada dövlət tərəfindən maliyyələşdirilən sosial qayğı xidmətlərindən yararlanmaq üçün şəxsin həm gəlir səviyyəsi qiymətləndirilir, həm də yüksək qayğı ehtiyacı olması tələb olunur.
Britaniyanın Fiskal Araşdırmalar İnstitutunun 2024-cü il hesabatına görə, uyğunluq meyarlarının sərtləşdirilməsi nəticəsində son on ildə Britaniyada dövlət tərəfindən maliyyələşdirilən sosial qayğı alan yaşlı insanların sayı əhalinin qocalmasına baxmayaraq 10 faiz azalıb.
Bölmənin digər xəbərləri
