Ər-Riyadda 9-cu “Gələcək investisiya təşəbbüsü” konfransı keçiriləcək
Qahirə, 20 oktyabr, AZƏRTAC
Oktyabrın 27-dən 30-dək Səudiyyə Ərəbistanının paytaxtı ər-Riyadda 9-cu “Gələcək investisiya təşəbbüsü” konfransı keçiriləcək.
AZƏRTAC xəbər verir ki, “İntibahın açarı” şüarı ilə təşkil olunacaq beynəlxalq tədbir qlobal iqtisadiyyat, investisiya və innovasiya gələcəyi ilə bağlı müzakirələr üçün ən mühüm platformalardan biridir.
“Gələcək investisiya təşəbbüsü” Fondunun İcraiyyə Komitəsinin sədri və icraçı direktoru Riçard Attias bildirib ki, tədbir çərçivəsində dəyəri 60 milyard ABŞ dollarını ötən müqavilələrin imzalanacağı gözlənilir. Tədbirdə dünyanın müxtəlif ölkələrindən yüksək səviyyəli investorların, qərarvericilərin və ekspertlərin geniş iştirakı gözlənilir.
Attias vurğulayıb ki, hazırkı iqtisadi dəyişikliklər fonunda dünyada geniş imkanlar mövcuddur və bu şəraitdə pozitiv və nikbin qalmaq son dərəcə vacibdir. O qeyd edib ki, konfransda qlobal səviyyədə tərəqqi, innovasiya ilə bağlı məsələləri, həmçinin beynəlxalq iqtisadi mənzərədəki ziddiyyətləri və çağırışları müzakirə ediləcək.
Attias əlavə edib ki, əvvəlki konfranslarda logistika, təmiz enerji, elm və texnologiya kimi müxtəlif sahələrdə ümumi dəyəri 200 milyard dollardan çox olan kommersiya razılaşmaları və müqavilələr imzalanıb. O, ötənilki konfrans zamanı bağlanan müqavilələrin ümumi dəyərinin 225 milyard Səudiyyə rialını (təxminən 60 milyard dollar) keçdiyini bildirib və builki tədbirdə də oxşar nəticə əldə olunacağına ümid etdiyini deyib.
Builki konfransda 20-dən çox ölkənin, o cümlədən Bolqarıstan, Macarıstan, Kuba, Ekvador, Qayana, İraq, Kosovo, Mavritaniya, Monteneqro, Pakistan, Ruanda və Suriyanın dövlət başçıları, eləcə də Çin Xalq Respublikasının sədr müavini, dünya miqyaslı şirkətlərin və iri investisiya fondlarının rəhbərləri iştirak edəcəklər. Müzakirələr iqtisadi əməkdaşlığın gücləndirilməsi və qlobal dəyişikliklər fonunda yeni imkanların araşdırılmasına yönələcək.
Konfransda 8000-dən çox iştirakçı, 600-dən çox məruzəçi və 250 panel müzakirəsi keçiriləcək. Bundan əlavə, müxtəlif ölkələrdən olan Baş icraçı direktorlar və dövlət rəsmiləri arasında görüşlər və seminarlar təşkil olunacaq. Üçüncü gün “İnvestisiya günü” adlanacaq və innovasiya ilə qlobal investisiya ekosisteminin qurulmasına həsr ediləcək.
Attias qeyd edib ki, təşəbbüsün yeni istiqaməti maliyyə sektorunun dominant rolundan texnologiya və süni intellektin roluna keçidi əks etdirir. Fond Rio-de-Janeyro və digər şəhərlərdə keçiriləcək yeni tədbirlər vasitəsilə Latın Amerikası və Afrika regionlarında öz fəaliyyətini genişləndirməyi planlaşdırır.
Konfrans çərçivəsində “İnnovasiyanın ziddiyyətləri” mövzusu müzakirə ediləcək, texnoloji inkişaf və iqtisadi siyasətlərin artıma təsiri, süni intellektin və yeni texnologiyaların qlobal iqtisadiyyatın formalaşmasındakı rolu araşdırılacaq. Həmçinin geosiyasi gərginliklərin və resurs bərabərsizliyinin təchizat zəncirləri və beynəlxalq əlaqələrə təsiri də diqqət mərkəzində olacaq.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
