Ərdoğan seçkilərin ilk turunda qələbə qazanacağına əminliyini ifadə edib
Bakı, 13 may, AZƏRTAC
Türkiyə Prezidenti Rəcəb Tayyib Ərdoğan seçkilərinin ilk turunda qələbə qazanacağına əmin olduğunu bildirib.
AZƏRTAC xəbər verir ki, Türkiyə Prezidentinin sözlərinə görə, səsvermənin nəticələri bir neçə il bundan öncə Kamal Kılıçdaroğluna dəstəyini ifadə edən Cozef Baydenə cavab olacaq: “Kamal Kılıçdaroğlu qələbə qazanacağı təqdirdə Rusiyaya qarşı sanksiya tətbiq edəcəyini deyir. Bu nə məntiqdir? Hər il Türkiyəyə beş milyondan çox rusiyalı turist gəlir. Siz ABŞ Prezidentindən aldığınız təlimatla hərəkət edirsiniz? Sabah seçicilər Cozef Baydenin cavabını verəcək”, - deyə Rəcəb Tayyib Ərdoğan vurğulayıb.
Türkiyədə prezident və parlament seçkiləri mayın 14-də keçiriləcək. Dövlət başçısı postu uğrunda üç namizəd - hazırkı Prezident Rəcəb Tayyib Ərdoğan, Cümhuriyyət Xalq Partiyasının sədri Kamal Kılıçdaroğlu və Ata İttifaqının namizədi Sinan Oğan mübarizə aparır. Politoloqlar mayın 28-də seçkilərin ikinci turunun keçiriləcəyini istisna etmirlər. Bu halda qalib gəlmək üçün sadə səs çoxluğu yetərli olacaq.
Bölmənin digər xəbərləri
