Ərdoğanın rəhbərliyi dövründə qardaş Türkiyənin əldə etdiyi uğurlar hər birimizi sevindirir – Şərh
Bakı, 27 aprel, AZƏRTAC
Qardaş Türkiyənin son zamanlar dünyada nüfuzunun artması hər birimizi sevindirir. Rəcəb Tayyib Ərdoğanın rəhbərliyi dövründə Türkiyənin xarici siyasətində nüfuzu xeyli artıb. O, bütün beynəlxalq platformalarda təsirli mövqeyə sahibdir. Ən nüfuzlu və yüksək potensiala malik insanlar Türkiyəni təhlükəsiz ölkə kimi görürlər. R.T.Ərdoğan Türkiyənin müstəqil xarici siyasət həyata keçirməsini təmin edib. Türkiyə dünyada artıq söz sahibi olan, öz siyasətini həyata keçirən ölkədir. İsrail-Fələstin, Rusiya-Ukrayna kimi münaqişələr başda olmaqla, Suriya, Liviya kimi mövzularda Türkiyə ən mühüm ölkə hesab olunur. Ukraynada davam edən müharibə nəticəsində dünyada baş verən ərzaq böhranının aradan qaldırılması üçün R.T.Ərdoğanın başlatdığı müzakirələr nəticəsində buğda razılaşması əldə edilib. Bu, Türkiyənin dünyada sülhə və qida təhlükəsizliyinə verdiyi önəmdir, həm də qardaş ölkənin nüfuzunun göstəricisidir. Qardaş dövlət həm Rusiyanın, həm də Ukraynanın etibar etdiyi və vasitəçilik üçün müraciət etdiyi ölkəyə çevrilib. Müharibə aparan bu iki ölkə arasında müzakirələr Türkiyədə həyata keçirilir. İnanıram ki, Rusiya-Ukrayna münaqişəsində Türkiyənin vasitəçiliyi bəhrəsini verəcək.
Bunu AZƏRTAC-a açıqlamasında Qardaşlığımız Əbədidir QHT Koalisiyasının və “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli söyləyib.
Vurğulayıb ki, artıq heç bir güc Türkiyəyə nə etməli olduğunu diktə edə bilmir. Onun maraqları üçün lazımi qərarlar xarici mərkəzlərdə deyil, Ankarada qəbul edilir. Eyni zamanda, “Dünya beşdən böyükdür”, - deyən Türkiyə Prezidenti beynəlxalq aləmdə haqsızlığa qarşı daim mübarizə aparır. İslam aləminin, türk dünyasının haqqını qoruyur. İŞİD kimi terror təşkilatlarına qarşı həyata keçirilən əməliyyatlar ilə İslam dinin terrorla assosiasiya etmək istəyənlərin planları pozur.
Onun sözlərinə görə, R.T.Ərdoğanın hakimiyyəti dövründə Türkiyənin inkişafı sahəsində ciddi uğurlar əldə edilib. Təhsildən tutmuş iqtisadi təşəbbüslərə qədər hər sahədə bərabər imkanları təmin edən işlər görülüb. Müdafiə sənayesi üzrə Türkiyə öz tələbatını ödəməklə yanaşı, İHA, SİHA, AKINCI və digər pilotsuz uçuş aparatları, quru hərbi nəqliyyat vasitələri, gəmilər olmaqla 170 ölkəyə müdafiə sənayesi məhsulları ixrac edən bir ölkəyə çevrilib. Ərdoğan hakimiyyətə gəlməzdən əvvəl Türkiyə ordusu özünü 20 faizədək müdafiə sənayesi ilə təmin edirdisə, bu gün bu 80 faizə çatıb. Türkiyənin müasir pilotsuz uçuş aparatları, hərbi helikopterləri və gəmiləri, tankları, xeyli sayda silah-sursat istehsal etməsi ölkəmizdə məmnunluqla qarşılanır. Qardaş ölkə artıq Azərbaycanla birlikdə hərbi məhsulların istehsalını həyata keçirir. Sənaye və texnologiya istiqamətində yaradılan 152 yeni mütəşəkkil sənaye zonası, 29 sənaye zonası və 94 texnoparkla ölkənin istehsal gücü artırılıb. Artıq yerli avtomobil TOGG-un istehsalı başa çatdırılıb və vətəndaşlara təqdim edilib.
“Türkiyənin dünyada və regionda əsas söz sahiblərindən birinə çevrilməsi bizim hər birimiz üçün qürur mənbəyidir. Türk birliyinin yaranmasında Türkiyə və Azərbaycan prezidentlərinin birgə səyləri hər zaman yüksək qiymətləndirilir. Bu birlik prezidentlər Rəcəb Tayyib Ərdoğan və İlham Əliyevin birgə fədakar əməyinin və uzaqgörənliyinin, müdrik siyasətlərinin nəticəsində yaranıb və bu sahədə çox böyük işlər görülüb. Rəcəb Tayyib Ərdoğanın başladığı bu işlər faydasını qısa zamanda türk xalqlarının mənafeyi naminə bəhrəsini verəcək. Digər tərəfdən Azərbaycan xalqının Rəcəb Tayyib Ərdoğana, Türkiyə xalqının İlham Əliyevə xüsusi sevgisi var. Bu qardaşlıq çox önəmlidir.
Türkiyə xalqı 44 günlük Vətən müharibəsində ilk gündən etibarən Azərbaycana mənəvi dəstək göstərək yanımızda oldu. Azərbaycan da daim çətin anlarda Türkiyəyə dəstək göstərib. Prezident İlham Əliyevin rəhbərliyi ilə Türkiyənin haqq işi daim müdafiə olunub. Azərbaycan 2021-ci ildə Türkiyədə baş vermiş meşə yanğınları zamanı ona böyük dəstək verib. Azərbaycan xalqı qardaş ölkədə bu ilin fevralında baş vermiş dəhşətli zəlzələ zamanı Türkiyənin yanında olub.
Azərbaycan-Türkiyə qardaşlığı Ərdoğan dövründə daha da dərinləşib. Prezidentlər İlham Əliyev və Rəcəb Tayyib Ərdoğan sayəsində Türkiyə-Azərbaycan münasibətləri tarixdə ən yüksək səviyyəyə yüksəlib. Qarabağın düşmən işğalından azad edilməsi üçün aparılan Vətən müharibəsində Türkiyə bir millət, iki dövlət prinsipinə layiq mövqe nümayiş etdirib, Azərbaycana böyük siyasi və mənəvi dəstək verilib, ərazilərimiz işğalçılardan təmizlənib”, - deyə Emin Həsənli qeyd edib.
İctimai Birliyin sədri bildirib ki, Türkiyənin hazırda türk dünyası ilə əlaqələri xəyal belə edilməyən səviyyəyə çatıb. Azərbaycan Prezidenti İlham Əliyev və Türkiyə Prezidenti R.T.Ərdoğanın birgə səyləri nəticəsində Türk Dövlətləri Təşkilatı beynəlxalq təşkilatlar arasında mühüm rol oynamağa başlayıb. Eyni zamanda, Türk birliyinin təmin olunması istiqamətində Ərdoğan dövründə atılan addımlar, bundan əvvəlki heç bir hakimiyyətin edə bilmədiyi qədər böyük olub.
Bölmənin digər xəbərləri
