AZƏRTAC İTAR-TASS-a istinadla xəbər verir ki, ərəb ölkələri başçılarının Sudanda keçirilmiş zirvə görüşünün iştirakçıları Fələstin xalqının siyasi və iqtisadi mənafelərini müdafiə etməyə hazır olduqlarını bildirmişlər. Görüşün yekunlarına dair qəbul olunmuş Xartum bəyannaməsində deyilir ki, Yaxın Şərqdə sabit və ədalətli sülh yalnız İsrail işğal etdiyi Fələstin torpaqlarından tamamilə getdikdən, paytaxtı Qüds olan Fələstin dövləti yaradıldıqdan və qaçqınlar problemi həll edildikdən sonra bərqərar ola bilər. Sənədə görə, ərəb ölkələri Fələstin-İsrail münaqişəsinin nizama salınmasına dair sülh təşəbbüsləri irəli sürməyə çalışacaqlar. Bəyannamədə Fələstin Muxtariyyəti ilə sərhədlərin birtərəfli qaydada müəyyən edilməsinə dair Təl-Əvivin planı qəti surətdə rədd edilir.
Bəyannamədə dünya birliyinə Fələstin xalqını müdafiə etmək, İsrail qoşunlarının Ərihadakı Fələstin həbsxanasına hücumu və məhbusların girov götürülməsi kimi hadisələrin təkrar olunmasına yol verməmək çağırışı əksini tapmışdır.
Ərəb ölkələri fələstinlilərə hər ay 55 milyon dollar məbləğində maliyyə yardımı göstərməyə hazır olduqlarını bildirmişlər. Xartum bəyannaməsi dünya birliyini parlament seçkilərində Həmas hərəkatına səs vermiş Fələstin xalqının seçiminə hörmətlə yanaşmağa və Muxtariyyətə iqtisadi yardım göstərilməsini davam etdirməyə çağırır.
