Erik Adams Nyu-York tarixində ikinci qaradərili mer olub
Bakı, 3 noyabr, AZƏRTAC
Nyu-York şəhərinin meri postuna keçirilən seçkilərdə bülletenlərin 97,76 faizinin nəticələrinə əsasən, demokrat Erik Adams 66,14 faiz səs toplayıb.
AZƏRTAC ABŞ KİV-inə istinadla xəbər verir ki, Erik Adamsın əsas rəqibi respublikaçı Kertis Silva artıq məğlubiyyətini etiraf edib. O, seçicilərin yalnız 28,66 faizinin dəstəyini qazanıb. Digər yeddi namizəd isə üç faizdən az səs toplayıb.
Erik Adams Nyu-York tarixində 20 il ərzində Bill de Blaziodan sonra ardıcıl olaraq ikinci demokrat mer və şəhərin ikinci qaradərili meri olub. O, yanvarın 1-də səlahiyyətlərinin icrasına başlayacaq.
Seçki kampaniyası proqramında son vaxtlar odlu silah tətbiq etməklə aparılan həbslərin sayının artdığını, atışmaların və nifrət səbəbindən törədilən cinayətlərin çoxaldığını vurğulayan Erik Adams Nyu-York şəhərini təhlükəsiz hala gətirmək üçün çalışacağını bildirib. O, həmçinin odlu silahlarla bağlı qanunları daha da sərtləşdirməyi, polisdə digər irqlərin nümayəndələri kimi qaradərililərin də sayını artırmağı vəd verib. Siyasətçi, eyni zamanda, Nyu-York şəhərinin polis rəisi postuna ilk dəfə qadın təyin etməyi planlaşdırır.
İqtisadi sahədə “yaşıl” iş yerlərinə investisiya ayıracağını, yeni iş yerlərinin açılması üçün səyləri artıracağını və kiçik biznes üçün cərimələri azaldacağını deyən Erik Adams səhiyyədə irqi uçurumu aradan qaldırmağı da düşünür.
Bölmənin digər xəbərləri
