Erməni separatizmini müdafiə edənlər baş verənlərə görə ciddi məsuliyyət daşıyırlar – Politoloq
Bakı, 20 sentyabr, AZƏRTAC
Dünən Daxili İşlər Nazirliyinin 4 əməkdaşı, Avtomobil Yolları Dövlət Agentliyinin isə 2 əməkdaşı növbəti erməni terrorunun qurbanı oldular. Onlar separatçıların Xocavənddə basdırdıqları minaya düşərək həyatlarını itirdilər. Qisas əməliyyatımız özünü çox gözlətmədi. Ordumuz həm şəhidlərimizin qisasını almaq, həm də bir daha bu cür xoşagəlməz halların baş verməməsi üçün lokal antiterror tədbirlərinə start verdi. Bu məsələdə Azərbaycan xalqı birmənalı şəkildə Ali Baş Komandanı və Ordumuzu dəstəkləyir.
Bu sözləri AZƏRTAC-a açıqlamasında politoloq Ramiz Alıyev söyləyib.
Dünyada terrorçuluğa qarşı mübarizənin gücləndiyi bir dönəmdə Azərbaycanda kök salmış erməni separatçılarının bu cür ağır cinayətə əl atmasının dözülməz olduğunu vurğulayan politoloq qeyd edib: “Azərbaycan iki gün əvvəl beynəlxalq ictimaiyyətə Qarabağda Ermənistana aid qanunsuz silahlıların sayı, orada olan hərbi texnika, silah-sursatla bağlı ətraflı məlumat verdi. Bunun ardınca vətəndaşlarımız separatçıların basdırdıqları minaya düşərək həyatlarını itirdilər. Bütün bunlar Azərbaycanın adekvat addımlar atmasını zərurətə çevirdi. Bu gün ölkəmizdə və xaricdə erməni separatizmini, erməni terrorunu müdafiə edənlər də baş verənlərə görə ciddi məsuliyyət daşıyırlar. Azərbaycan polisinin, vətəndaşlarımızın həlak olmalarının məsuliyyəti erməni terrorçuları ilə yanaşı, onları dəstəkləyənlərin də üzərinə düşür. Erməniləri himayə edən böyük dövlətlər, beynəlxalq təşkilatlar artıq Qarabağdakı terrorçuları dəstəkləməkdən, onların hüquqlarını gündəmə gətirməkdən vaz keçməlidirlər. Qarabağ bölgəsindəki Ermənistan silahlı qüvvələrinin birləşmələri tərəfindən Ordumuzun mövqeləri son vaxtlar intensiv şəkildə atəşə tutulurdu. Onlar təmizlənən ərazilərə gizlin şəkildə yenidən minalar basdırırdılar. Ərazilərdə səngər və sığınacaqlar qazmaları da tərəfimizdən müşahidə edilirdi. Erməni kəşfiyyat-diversiya qruplarının Əhmədbəyli-Füzuli-Şuşa avtomobil yolunda minalar basdırması Ermənistanın Azərbaycana qarşı apardığı məqsədyönlü terror siyasətinin davamıdır. 2020-ci il 10 noyabr tarixli üçtərəfli Bəyanata əsasən Qarabağdakı erməni silahlılar tərksilah edilməli idilər. Qarabağda Ermənistan silahlı qüvvələrinin birləşmələrinin mövcudluğu sülh və sabitliyə təhdiddir. Üçtərəfli Bəyanatın müddəalarının yerinə yetirilməsi, Qarabağda törədilən və planlaşdırılan genişmiqyaslı təxribatların qarşısının alınması, işğaldan azad edilmiş ərazilərə qayıdan dinc əhalinin təhlükəsizliyinin təmin olunması və ən əsası, dövlətimizin konstitusion quruluşunun bərpa edilməsi məqsədilə lokal xarakterli antiterror tədbirlərinə artıq başlanılıb. Ordumuz tərəfindən mülki əhali və infrastruktur obyektləri hədəfə alınmır, yalnız müəyyən olunmuş hərbi hədəflər məhv edilir. Düşünürəm ki, mülki ermənilər separatçıların onlardan sipər kimi istifadə etmələrinə imkan verməyəcəklər. Əgər orada mülki şəxslər güllə yarası alacaqlarsa, bunun məsuliyyəti dinc ermənilərin arxasında gizlənib Azərbaycan Ordusuna atəş açan silahlı erməninin üzərinə düşəcək”.
Ramiz Alıyev əlavə edib ki, 44 günlük Vətən müharibəsində olduğu kimi bu gün də xalq Ali Baş Komandanı dəstəkləyir: “Biz inanırıq ki, Qarabağda aparılan təmizləmə işləri sona qədər davam etdiriləcək. Qarabağda bir nəfər terrorçunun və separatçının qalması belə ciddi təhlükədir. Sonuncu terrorçu məhv edilənə qədər əməliyyatlar aparılacaq. Onlar ya məhv ediləcək, ya da həbs olunacaqlar. Qarabağdakı hərbi xunta rejimi silahı yerə qoymalı və təslim olmalıdır. Biz Azərbaycanın Prezidentinə və Ordumuza güvənirik".
Bölmənin digər xəbərləri
