Ermənistan Ordusu növbəti dəfə layiqli cavabını aldı - Hərbi ekspert
Bakı, 12 aprel, AZƏRTAC
Azərbaycan-Ermənistan sərhədində baş vermiş təxribatlar bir daha onu göstərir ki, qarşı tərəf regionda maraqlı olan müxtəlif qüvvələrin sifarişini təmin etmək üçün əlindən gələni əsirgəmir. Ermənistanın korpus komandirinin təxribatların baş verdiyi ərazidə olması bir daha onu göstərir ki, düşmən daha əvvəlcədən bu təxribatların törədilməsinə məqsədli şəkildə hazırlaşırdı. Ermənistan tərəfi özünə bəraət qazandırmaq məqsədilə korpus komandirinin ərazidə olması ilə bağlı bir-biri ilə ziddiyyət təşkil edən iki açıqlama verməklə bu mövzuda aydın və təxribatçı mövqeyə malik olduğunu ortaya qoydu. Strateji əhəmiyyət kəsb etməyən obyektdə korpus komandirinin olması aydın şəkildə göstərdi ki, təxribat Ermənistanın hərbi rəhbərliyinin bilavasitə nəzarətində olub. Bu, onların az-çox anlaşıqlı cavab hazırlamaq axtarışında olduqlarını, həmçinin gözlənilməz nəticələrin çaşqınlıq yaratdığını, nəticə etibarilə planlarının tam pozulduğunu göstərdi.
Bu fikirləri AZƏRTAC-a açıqlamasında hərbi ekspert Ədalət Verdiyev söyləyib.
Onun sözlərinə görə, Ermənistan tərəfi hesab edirdi ki, bu təxribatlarla həm İrandan mümkün ola biləcək təlimatları yerinə yetirəcək, həm də Avropa İttifaqının (Aİ) monitorinq missiyasının Azərbaycana qarşı fəaliyyətə yönləndirməyə nail olacaq, həm də Azərbaycanın ötən ayın sonunda əldə etdiyi mühüm yüksəkliklər arasında köməkçi yolları nəzarətə götürməklə daha əvvəl Qarabağın təminat və təchizatında itirdiyi marşrutlardan heç olmasa birini nəzarəti altında saxlaya biləcək. Ermənistan Aİ missiyasının ölkədə olduğuna güvənərək ümid edirdi ki, bu həmlə ilə Azərbaycanı günahkar kimi göstərmək mümkün olacaq. Ancaq onlar istəyinə nail ola bilmədi və indi təxribatına izahat vermək məcburiyyətindədir.
Ədalət Verdiyev qeyd edib ki, bu təxribat danışıqlar prosesində müəyyən pozitiv meyillərin olduğu, hətta gündəlikdə tərəflərin danışıqları davam etdirmək üçün Vaşinqtona dəvət olunacağı məsələsi olduğu dövrdə baş verdi. Son təxribat Ermənistan tərəfinin sülh barədə verdiyi bəyanatları tamamilə ictimaiyyəti yanlış istiqamətə yönəndirmək məqsədi daşıdığını bir daha göstərdi. Vaşinqtonda sülh sazişinin imzalanması üzrə danışıqlara Ermənistan tərəfi ciddi yanaşmır. Ermənistanın hərbi-siyasi rəhbərliyi mövcud problemlərin aradan qaldırılması əvəzinə, onların daha da dərinləşməsində maraqlıdır.
“Odur ki, bu hadisəyə görə bütün məsuliyyət Ermənistanın hərbi-siyasi rəhbərliyinin üzərinə düşür. Təcavüzkar ölkənin hakimiyyəti başa düşməlidir ki, müxtəlif qüvvələrin dəstəyini əldə edib öz məqsədlərini gerçəkləşdirəcəyinə ümid etməkdənsə, ardıcıl təxribatlar yolunu davam etdirməkdənsə, mövcud reallıqlarla barışıb sülh müqaviləsi üzərində işləri davam etdirsə, həm Ermənistan dövləti, həm də erməni xalqı üçün daha yaxşı olar.
Nəticə etibarı ilə bu əməliyyatlar sübut etdi ki, Azərbaycan tərəfi Ermənistan ordusundan dəfələrlə yüksək potensiala malikdir. İstənilən təxribatın qarşısını alınması üçün ordumuzun kifayət qədər imkanı mövcuddur. Belə təxribatların törədilməsi heç bir halda Azərbaycanı tutduğu haqlı və ədalətli mövqedən geri çəkindirə bilməz. Ermənistan Ordusu qarşısına qoyduğu hədəflərə nail ola bilmədi, niyyətləri gerçəkləşmədi, əksinə, növbəti dəfə Azərbaycan Ordusundan layiqli cavabını aldı, şəhidlərimizin qanı yerdə qalmadı. Ermənistan isə dəfələrlə artıq itkilərə məruz qaldı”, - deyə ekspert vurğulayıb.
Bölmənin digər xəbərləri
