Ermənistan sülh gündəliyinə xələl gətirə biləcək addımlardan uzaq durmalıdır ŞƏRH
Bakı, 16 sentyabr, AZƏRTAC
Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura səfərinə Ermənistan cəmiyyətinin müəyyən dairələri tərəfindən göstərilən reaksiyalar təəssüf doğurur və regionda sülh gündəliyi baxımından narahatlıq yaradır. İlk növbədə, qeyd edilməlidir ki, Qarabağ Azərbaycanın beynəlxalq səviyyədə tanınmış ərazisidir. Azərbaycan ərazisində akkreditə olunmuş diplomatik nümayəndələrin ölkənin müxtəlif bölgələrinə səfər etməsi Azərbaycanın daxili işi və suveren hüququ çərçivəsində baş verir. Bu səfərə görə xarici diplomatların hədəfə alınması və onlara təzyiq göstərilməsinə çağırışlar diplomatik münasibətlərin və dövlətlərin suverenliyinə hörmət prinsipinin ruhuna uyğun deyil.
Bu sözləri AZƏRTAC-a açıqlamasında Milli Məclisin deputatı Əlibala Məhərrəmzadə söyləyib.
O bildirib ki, diqqətçəkən məsələ Ermənistan cəmiyyətində tarixi və mədəni irslə bağlı formalaşdırılan birtərəfli yanaşmalardır. Qafqaz Albaniyasının tarixi və mədəni irsi də bu kontekstdə xüsusi əhəmiyyət daşıyır. Bu irsin siyasi məqsədlərlə müxtəlif şəkildə şərh edilməsi əvəzinə, məsələyə tarixşünaslığın və arxeologiyanın elmi prinsipləri əsasında yanaşılması daha doğru olardı. Tarixi irs siyasi qarşıdurmanın deyil, xalqlar arasında dialoqun və qarşılıqlı anlaşmanın vasitəsinə çevrilməlidir.
“Ermənistanın müxtəlif siyasi və ictimai dairələrində səslənən bəyanatların sülh prosesinə təsirini ayrıca qiymətləndirmək lazımdır. Xüsusilə revanşist ritorikanın güclənməsi regionda etimad mühitinə mənfi təsir göstərə bilər. Ermənistan parlamentinin sədri Ruben Rubinyanın diplomatların səfəri ilə bağlı açıqlaması da bu baxımdan müzakirə mövzusudur. Onun xarici diplomatların Azərbaycanın suveren ərazisinə səfərinə münasibət bildirilməsi Azərbaycan tərəfindən daxili işlərə müdaxilə kimi qiymətləndirilə bilər. Sülh prosesinin davamlılığı üçün əsas məsələ qarşılıqlı ittihamların deyil, əldə olunmuş razılaşmaların və dövlətlərin ərazi bütövlüyü və suverenliyinə hörmət prinsipinin əsas götürülməsidir. Sülh prosesində əldə olunan irəliləyişlərin Ermənistan cəmiyyətində qarşıdurma yaradan ritorika ilə kölgələnməsi sülh prosesinə xidmət etmir”, - deyə Ə.Məhərrəmzadə vurğulayıb.
Deputat əlavə edib ki, mədəni irsin qorunması məsələsi etnik mənsubiyyətdən asılı olmayaraq universal prinsip kimi qəbul edilməlidir. Bu baxımdan Ermənistanda həm siyasi dairələrin, həm də ictimaiyyətin məsuliyyətli ritorikaya üstünlük verməsi, tarixi məsələlərin siyasiləşdirilməsindən çəkinməsi, sülh gündəliyinə xələl gətirə biləcək addımlardan uzaq durması vacibdir.
Bölmənin digər xəbərləri
