Bakı, 19 sentyabr, AZƏRTAC

Bu gün Xocavənd rayonu ərazisində ermənilər tərəfindən törədilən terror aktı birbaşa Ermənistanın, separatçı rejimin əsas niyyət və məqsədini aydın şəkildə ortaya qoymaqdadır. Məlum olduğu kimi, bu, separatçılar tərəfindən törədilən çoxsaylı terror aktlarından sadəcə biridir. Azərbaycan tərəfi həm İkinci Qarabağ müharibəsindən əvvəl, həm də sonra məsələnin sülh və humanizm prinsipləri çərçivəsində həll edilməsi üçün əlindən gələn hər şeyi etdi. Amma bunun qarşılığı olaraq Ermənistan və Qarabağdakı separatçı rejim ölkəmizə qarşı riyakar davranışlar sərgilədi.

Bu sözləri AZƏRTAC-a açıqlamasında hərbi ekspert Azər Bayramov söyləyib.

“Son günlər ərazilərimizdə olan qanunsuz hərbi birləşmələrin təxribatlarının və terror aktlarının davamlı xarakter aldığını müşahidə edirik. Əlbəttə ki, həmin qanunsuz dəstələrin ərazilərimizdəki varlığı Qarabağın, ümumilikdə, Azərbaycanın təhlükəsizliyinə ciddi təhdid olaraq qalır. Azərbaycan dövləti dəfələrlə bəyan edib ki, 2020-ci il 10 noyabr tarixli üçtərəfli Bəyanatın dördüncü bəndinə əsasən Ermənistan üzərinə düşən öhdəlikləri yerinə yetirməlidir. Amma gördüyümüz kimi, Ermənistan öz öhdəliklərini yerinə yetirməməkdə israrlıdır. Bundan əlavə, 44 günlük Vətən müharibəsindən sonra Ermənistan həmin qüvvələri maliyyələşdirir və onları ölkəmizə qarşı təzyiq vasitəsi kimi istifadə edir. Azərbaycan ərazilərində mütəmadi olaraq terror aktlarının törədilməsində bütün məsuliyyəti Ermənistanın hərbi-siyasi rəhbərliyi və Qarabağdakı qondarma rejim daşıyır”, - deyə ekspert vurğulayıb.

Onun sözlərinə görə, törədilən təxribatlar və mina terroru Rusiya sülhməramlılarının müvəqqəti yerləşdirildiyi məsuliyyət zonasında baş verir. Bu səbəbdən də onlar separatçıların cinayətlərinə qarşı preventiv tədbirlər görmədiyi üçün məsuliyyət daşıyırlar. Daha əvvəlki proseslərə də baxdıqda görürük ki, Rusiya sülhməramlıları separatçıların bu cür davranışları barədə hər hansı tədbir görməyib. Bu da separatçıların öz əməllərini davam etdirməsinə təkan verir və zəmin yaradır. Azərbaycan öz təcrübəsinə əsasən bilir ki, Ermənistan hər hansısa bir humanist yanaşmada və yaxud da siyasi, diplomatik danışıqlar yolu ilə məsələnin həllində nə dərəcədə qətiyyətsizdir.

A.Bayramov bildirib ki, işğaldan azad edilmiş ərazilərə Azərbaycanın mülki vətəndaşlarının qayıtması, eyni zamanda, onların təhlükəsizliyinin təmin edilməsi baxımından bir çox addımların atılması məcburiyyət və zərurətə çevrilib. Bu da ondan xəbər verir ki, Ermənistan tərəfinin belə terrorçu hərəkətləri qarşılıqsız qalmayacaq. Bütün məsuliyyət Ermənistanın və separatçıların hərbi-siyasi rəhbərliyinin üzərinə düşür.

Qeyd edək ki, sentyabrın 19-da bir nəqliyyat vasitəsi Rusiya sülhməramlı kontingentinin müvəqqəti yerləşdirildiyi Azərbaycan ərazilərində mövcud olan erməni silahlı qüvvələrinin təxribat-diversiya qrupu tərəfindən Xocavənd rayonu ərazisində basdırılmış tank əleyhinə minaya düşərək partlayıb. Bu təxribat nəticəsində 2 mülki şəxs həlak olub.

Həm gün, qeyd edilən terrorun baş verdiyi əraziyə yola düşən Daxili İşlər Nazirliyinin 4 əməkdaşı Xocavənd rayonunun Tağaverd kəndi ərazisində yeni inşa olunan tunel yolunda minaya düşərək həlak olublar.

2020-ci ildə 44 günlük Vətən müharibəsindən indiyə qədər ümumilikdə mina qurbanlarının sayı 314 nəfərə çatıb, onlardan 61 nəfər həlak olub.