Ermənistanla sərhəddə yerləşən kənd məktəbindən REPORTAJ VİDEO
Oktyabrın 5-i Beynəlxalq Müəllimlər Günüdür
Qazax, 5 oktyabr, R.Novruzoğlu, AZƏRTAC
Müəllimlik olduqca çətin, eyni zamanda, şərəfli peşədir. Bəzi müəllimlər var ki, bu peşəni bir qədər də çətin şəraitdə davam etdirməli olurlar. Məsələn, ucqar bir kənddə, dağlıq, soyuq bir ərazidə dərs deməli olurlar. Söhbət açacağımız müəllimlərimiz isə Ermənistanla sərhəd yaşayış məntəqəsi olan Qazaxın Quşçu Ayrım kəndində işləyirlər.
AZƏRTAC xəbər verir ki, Quşçu Ayrım kəndi Qazaxın həm ucqar, həm də Ermənistanla sərhəddə yerləşən yaşayış məntəqələrindən biridir. 2014-cü ildən kənddə yeni orta məktəb tikilərək istifadəyə verilib. Burada hələ inşaat işi aparılarkən də düşmən dəfələrlə məktəbi atəşə tutub. Divarlarda güllə izlərinə də rast gəlmək olur.
Məktəbdə olarkən ibtidai siniflərə dərs deyən Lətif Dünyamalıyevin öz şagirdlərinə və eyni zamanda, peşəsinə necə bağlı olduğunu və necə həvəslə, sevə-sevə dərs keçdiyinin şahidi olduq. Deyir ki, uşaqlıqdan arzusu müəllim işləmək olub. Xüsusən də aşağı sinif şagirdləri ilə işləməyin daha maraqlı olduğunu söyləyir. 23 ildir pedaqoji fəaliyyətlə məşğul olan 56 yaşlı Lətif müəllim təhsildə xidmətlərinə görə dəfələrlə mükafatlandırılıb. Diaqnostik qiymətləndirmədən 49 bal, sertifikasiya imtahanından isə 52 bal toplayıb. “İbtidai sinif müəllimi kimi fəaliyyət göstərirəm. Kəndimiz 3 tərəfdən erməni postunun əhatəsində olmasına, məktəbimizə çoxsaylı düşmən gülləsinin atılmasına baxmayaraq, biz tədrisi heç zaman dayandırmamışıq, dərsləri lazımi qaydada keçmişik. Dərs keçdiyim şagirdlərdən ali məktəbə daxil olanlar da var. 1992-ci ildə tələbə ikən kəndimizin müdafiəsində iştirak etmişəm. İnstitutu bitirdikdən sonra da döyüşlərə qatılmışam. Bu gün də təhsil sahəsində millətimə xidmət edirəm”, - deyə o bildirib.
Lətif müəllim deyir ki, ibtidai sinif müəlliminin kişi, ya da qadın olmasının fərqi yoxdur. Əsas odur ki, peşəyə bağlı olub, onu sevərək tədris edəsən: “Mən hər dəfə dərsdən çıxıb evə gedəndə özümdə bir qürur hiss edirəm. Ona görə ki, hər gün dərsə gündəlik icmal əsasında hazırlıqlı gəlirəm. Şagirdlərimə yazı, hərf öyrətdikcə özümdə böyük sevinc hissi edirəm ki, mən bu gün yazı bilməyən, ünsiyyət qura bilməyən şagirdə nəsə öyrədə bildim. Çünki elə ailələr var ki, risk qrupuna aiddir. Müharibə şəraitində yaşayıblar, psixologiyalarında müəyyən problemlər var, onlarla ünsiyyətə girib, fərdi şəkildə dərs keçib, dərsdən sonra da onlarla maraqlanıram. Çalışıram ki, cəmiyyətimiz üçün layiqli vətəndaşlar yetişdirim”.
Şagirdlər də müəllimlərinin dərslərini hər gün maraqla dinləyir, tapşırıqları yerinə yetirməyə çalışırlar. Onlar da Lətif müəllimi çox sevdiklərini deyirlər. “Lətif müəllim çox yaxşı müəllimdir. Biz onun sayəsində yazıb-oxumağı öyrənmişik”, - deyə 4-cü sinif şagirdi Nuray İsmayılova bildirib.
Pedaqoji kollektiv də Lətif müəllimin olduqca ciddi, tələbkar və savadlı həmkar olduğunu deyirlər. Quşçu Ayrım kənd tam orta məktəbin direktoru Yetər Mustafayeva: “Lətif müəllim məktəbimizin seçilən müəllimlərindəndir. İşinə çox tələbkardır. Ümumiyyətlə, sərhəd kənd olmağın da çətinlikləri var. Xüsusilə, ermənilərlə sərhəddə olmağımıza görə zaman-zaman çox çətin anlar yaşamışıq. Biz belə anların heç birində tədrisdən kənarda qalıb, məktəbi bağlamamışıq. Binamız 2014-cü ildə yeni tikilərək bizə təhvil verilib. Elə binada inşaat işləri gedərkən də dəfələrlə atəşə məruz qalmışıq. Buna baxmayaraq, binamız müasir tələblərə uyğun tikilib istifadəyə verilib”.
Məktəbdə onu da öyrəndik ki, Lətif müəllimlə bərabər, Rəsul müəllim də digər bir ibtidai sinfə dərs keçir. O da Birinci Qarabağ müharibəsinin iştirakçısıdır. Ərazilərimizin bütövlüyü uğrunda savaşda sağ qolunu itirsə də, 22 ildir müəllim kimi bu şərəfli peşəni kənddə davam etdirir, şagirdlərə öz biliklərini aşılayır. Bu şərəfli yolda çətin anlarla da rastlaşıb. “Birdən elə anlar olurdu ki, atəşkəs pozulanda uşaqları ya sığınacaqlara, ya da ən yaxın daldalanacaqlağa yığıb qoruyurduq. Dərs zamanı ermənilər atəş açır, atəşkəsi pozurdu. Gördüyünüz kimi, kəndimizin ərazisində hündürmərtəbəli bina məktəbimizdir. Atəşkəs pozulanda birinci məktəbin binasına, həyətinə iriçaplı pulemyotlardan atəş edirdilər. Binanın divarında, damında güllə izləri hələ də qalmaqdadır. Buna baxmayaraq, işimizi sevə-sevə görmüşük. Hər bir sahənin çətinliyi var. Amma bu sahədə olan çətinliyə çətinlik deməzdim, zəhmət deyərdim. Çünki sonu sevincdir. Həm şagirdlər, həm valideynlər, həm də biz sevinirik”, - deyə Rəsul Nəsibov bildirib.
Barəsində söhbət açdığımız müəllimlərin məzunlarından müxtəlif ali məktəblərə daxil olan, müxtəlif peşələrdə çalışanlar var. Müəllimlər də zəhmətlərinin bəhrəsini gördükcə qürurlanır, həmin məzunların valideynləri qədər sevinirlər. Məhz müəllimlik peşəsinin aliliyi də elə bundadır. Çətinlikləri aşan, zəhmətlərə qatlaşan, cəmiyyət üçün faydalı şəxslərin yetişməsində müəllimlərin əməyi danılmazdır. İstər sərhəd kənddə olsun, istər dağlıq ərazilərdəki yaşayış məntəqələrindəki məktəblərdə, soyuqda və istidə, istər yağışlı, istər günəşli şəraitdə öz şərəfli peşəsini layiqincə davam etdirən kifayət qədər müəllim ordumuz var. Bayramınız mübarək!
Bölmənin digər xəbərləri
