Əsas vəzifə insanların sağlamlığının qorunması və sosial müdafiəsinin daha da gücləndirilməsidir
Bakı, 20 aprel, AZƏRTAC
Azərbaycanda həyata keçirilən dövlət siyasətinin prioritetini əhalinin sosial müdafiəsinin daha da gücləndirilməsi və sağlamlığının qorunması təşkil edir. Koronavirus kabusunun dünyanın başı üzərini aldığı vaxtdan dövlətimizin başçısının atdığı qətiyyətli addımlar xalqın gələcəyə olan inamını daha artırıb. Bunu Prezident İlham Əliyevə hər gün ünvanlanan yüzlərlə minnətdarlıq məktubları da təsdiqləyir. Vətəndaşlar haqlı olaraq deyirlər: “Cənab Prezident, biz Sizinlə güclüyük”.
Bu fikirləri AZƏRTAC-a Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru Kamil Seyidov bildirib.
Partiya sədri deyib ki, aprelin 17-də Prezident İlham Əliyevin Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarovun iştirakı ilə videobağlantı formatında keçirdiyi iclasda verdiyi tapşırıq və göstərişlər, ümumiyyətlə, dövlətimizin başçısının atdığı qətiyyətli addımlar bir daha təsdiqlədi ki, koronavirus epidemiyası dünyanın ən inkişaf etmiş ölkələrinə vurduğu zərbəni cəmi 29 illik müstəqillik tarixi olan Azərbaycana vura bilmədi. Çünki bu ölkənin əhalisinin güzəranın yaxşılaşdırılmasını, sosial müdafiəsinin gücləndirilməsini, sağlamlığının qorunmasını daim düşünən cənab İlham Əliyev kimi lideri var. ABŞ, Çin, İspaniya, İtaliya, Fransa, Almaniya və digər dövlətlər ağır itkilər versələr də, Azərbaycanda bu virusun geniş yayılmasının qarşısı məharətlə alınır, əhaliyə dəyən ziyan dövlət vəsaiti hesabına ödənilir. Dövlətimizin başçısı videobağlantı formatında keçirdiyi iclasda bir daha vurğuladı ki, bizim üçün prioritet məsələ insanların sağlamlığıdır, sosial müdafiəsidir. Ona görə də dövlətimizin başçısı bu sahənin gücləndirilməsi üçün indiki şəraitdə iqtisadi sahəyə daha çox diqqət verilməsinin vacibliyini qeyd etdi. Çünki güclü iqtisadi imkanlarımız olmasa, sosial siyasətimizi uğurla apara bilmərik, xüsusilə pandemiya dövründə. Məlum olduğu kimi, hazırkı şəraitdə pandemiyanın fəsadlarının aradan qaldırılması üçün böyük maliyyə vəsaiti tələb olunur. Dövlətimizin başçısı bir daha bəyan etdi ki, pandemiya dövründə bizim üçün əsas prioritetlər insanların sağlamlığı, onların sosial müdafiəsi və vəziyyətə uyğun şəkildə iqtisadi fəallığın artmasıdır.
Azərbaycan Prezidentinin videobağlantı formatında keçirdiyi iclasda 200 min işsiz insana veriləcək 190 manat müavinətin 600 min nəfərə verilməsi barədə tapşırığı əhalinin sosial müdafiəsinin gücləndirilməsi istiqamətində atılan növbəti qətiyyətli addım oldu. Göründüyü kimi, 200 min əvəzinə, 600 min insana dövlət iki ay ərzində hər ay 190 manat vəsait verməlidir. Bu kateqoriyaya aid olan insanlar, əsasən aztəminatlı təbəqənin nümayəndələri, eyni zamanda, koronavirusla bağlı işini itirən və qeyri-formal məşğulluqla məşğul olan insanlardır. Onların problemlərini dövlət öz üzərinə götürdü.
Dövlətimizin başçısının ödənişli ictimai iş yerlərinin açılması ilə bağlı verdiyi tapşırıq da böyük razılıqla qarşılanıb. Məlum olduğu kimi, ilin əvvəlindən 37 min iş yerinin açılması nəzərdə tutulmuşdu. Ancaq pandemiyaya görə işsizliyin qaçılmaz artımını nəzərə alaraq Prezidentin göstərişi ilə ilkin mərhələdə bu rəqəm 50 minə çatdırılmalı idi. Lakin dövlət başçısı daha bir humanist addım ataraq bu il 90 min ödənişli ictimai iş yeri yaradılması barədə göstəriş verdi. Son məlumata görə, artıq 80 min ailə, 330 mindən çox fərd ünvanlı sosial yardım proqramı ilə əhatə olunub. Aprelin 1-i ilə müqayisədə artım 10 min ailə və ya 36 min şəxsdir. Hadisələrin gedişi göstərir ki, bu da son rəqəm olmayacaq.
“İclasda toxunulan bir məsələni də qeyd etməyi özümə borc bildim. Belə ki, dövlətimizin başçısının tapşırığına əsasən, bu il daha 1500 şəhid ailəsi mənzillə təmin olunacaq. Belə faktlar onlarladır. Biz Prezidentimizin ətrafında daha sıx birləşərək həmrəylik nümayiş etdirməli və koronavirus təhlükəsindən az itki ilə çıxmalıyıq. Təəssüf ki, adını müxalifət qoyan bəzi ünsürlər belə çətin və gərgin məqamlardan da sui-istifadə edərək, xarici ağalarının sifarişlərini yerinə yetirir, görülən işlərə kölgə salmaq üçün min bir oyundan çıxırlar. Bütün bunlar isə heç bir önəm kəsb etmir. Bunu dövlətimizin başçısına hər gün gələn minlərlə minnətdarlıq məktubları da təsdiqləyir”, - deyə partiya sədri qeyd edib.
Bölmənin digər xəbərləri
