E.ŞEVARDNADZE: CARİ İL CƏNUBİ QAFQAZDAKI MÜNAQİŞƏLƏRİN ARADAN QALDIRILMASINDA HƏLLEDİCİ İL OLACAQ
Gürcüstan Prezidenti bazar ertəsi milli radio ilə növbəti çıxışında ölkədə siyasi-iqtisadi vəziyyətdən, müxtəlif sahələrdə aparılan islahatların gedişindən, əhalinin güzaranını yaxşılaşdırmaq üçün görülən tədbirlərdən danışmışdır.
Dövlət başçısı bütün Cənubi Qafqaz regionu xalqlarını illərdən bəri ciddi narahat edən gürcü-abxaz və Dağlıq Qarabağ münaqişələrinə də toxunmuşdur. Cənab Şevardnadze əminliklə bəyan etmişdir ki, 2002-ci il regiondakı bütün münaqişələrin aradan qaldırılmasında və Cənubi Qafqazda sülhün, sabitliyin bərqərar edilməsində həlledici il olacaqdır. Prezident gürcü-abxaz münaqişəsi ilə əlaqədar BMT Təhlükəsizlik Şurasının qətnaməsini yüksək qiymətləndirmişdir.
Gürcüstan rəhbəri yaxın günlərdə Pankisi dərəsinə gedərək, vəziyyətlə yerində tanış olacağını bildirmişdir. O demişdir: “Oraya səfərimdən başlıca məqsəd son vaxtlar bəzi dövlətlərin, xüsusən Rusiyanın kütləvi informasiya vasitələrində ölkəmizin həmin bölgəsindəki həqiqi vəziyyəti təhrif edən, guya çeçen yaraqlılarının buranı özləri üçün hazırlıq mərkəzinə çevirdikləri barədə uydurma yazıları təkzib etmək və dünya ictimaiyyətinə doğru-düzgün məlumat verməkdir”.
Şahismayıl Məmmədov
AZƏRTAC-ın xüsusi müxbiri
Tbilisi
Bölmənin digər xəbərləri
