ESTONİYA PREZİDENTİ GÜRCÜ HƏMKARININ SİYASƏTİNİ DƏSTƏKLƏYİR

22.09.2004 [17:46]
Çap et
A⁺ A^-

AZƏRTAC “Novosti” agentliyinə istinadla xəbər verir ki, Nyu-Yorkda BMT Baş Məclisinin 59-cu sessiyasında iştirak edən Estoniya Prezidenti Arnold Rüütel gürcü həmkarı Mixail Saakaşvilinin ölkədə demokratik islahatlar aparmaq və Gürcüstanın bütün ərazisində onun suverenliyini bərpa etmək səylərini dəstəklədiyini açıqlamışdır.

Estoniya dövləti başçısı dəftərxanasının mətbuat xidməti bildirmişdir ki, Rüütel M.Saakaşvili ilə görüşdə onun Gürcüstanla Cənubi Osetiya arasında münaqişənin həllində kömək göstərilməsi xahişilə avqustda beynəlxalq birliyə müraciətini nəzərdə tutaraq, müsahibini əmin etmişdir ki, Estoniya bu kəskin məsələnin ATƏT-in rəhbərliyi ilə konstruktiv və dinc yolla həllini dəstəkləyir.

Estoniya Prezidenti, həmçinin ümidvar olduğunu söyləmişdir ki, münaqişə tərəfləri problemin həllində diplomatik dialoqa üstünlük verəcəklər.

M.Saakaşvili demişdir ki, Gürcüstan iqtisadi və demokratik islahatlar apararkən Estoniyadan nümunə götürür. O, Gürcüstanın NATO və Avropa Birliyi ilə daha sıx əlaqələr yaratmasında Estoniyanın köməyinə ümid bəslədiyini nəzərə çarpdırmışdır.

Gürcüstan Prezidenti oktyabrın əvvəllərində Estoniyaya dövlət səfəri etməyə hazır olduğunu təsdiqləmişdir.