“Eureporter” portalında azərbaycanlı deputatın məqaləsi dərc olunub
Bakı, 10 iyul, AZƏRTAC
Avropa İttifaqının “Eureporter” portalında Milli Məclisin deputatı Məzahir Əfəndiyevin “Azerbaijan keeping strong in achieving “2030 Agenda” in South-Caucasus despite challenges” sərlövhəli məqaləsi dərc olunub.
AZƏRTAC xəbər verir ki, məqalədə Azərbaycanın Birləşmiş Millətlər Təşkilatı ilə yüksək səviyyəli əməkdaşlığına, ölkəmizin 2000-ci ildən BMT-nin “Minilliyin İnkişaf Məqsədləri” bəyannaməsini ulu öndər Heydər Əliyevin rəhbərliyi ilə uğurla icra etməsinə, 2015-ci ildə təşkilata üzv dövlətlər tərəfindən yekdilliklə qəbul olunan “2030 Gündəliyi”nin fəal iştirakçısına çevrilməsinə və Prezident İlham Əliyevin rəhbərliyi ilə Dayanıqlı İnkişaf Məqsədlərinin hədəflərinə nail olunması istiqamətində görülən işlərə dair məlumatlar əksini tapıb.
Bildirilib ki, Azərbaycanın 2020-ci il üzrə Dayanıqlı İnkişaf Hesabatında “dayanıqlı inkişaf məqsədləri indeksi” üzrə mümkün 100 baldan 72,4 bal topla¬yaraq dünyanın 165 ölkəsi arasında 55-ci, Cənubi Qafqazda isə lider olması diqqətəlayiq məqamlardandır.
Deputat, eyni zamanda, Müzəffər Ali Baş Komandan, böyük Sərkərdə İlham Əliyevin rəhbərliyi ilə şanlı Azərbaycan Ordusunun Qələbəsinin nəticəsi olaraq 30 illik qanunsuz işğala son qoyulduğunu qeyd edərək, uzun illərdən sonra ilk dəfə ölkəmizdə DİM16 (Sülh, ədalət və səmərəli müəssisələr) məqsədi üzrə irəliləyişin qeydə alındığını vurğulayıb.
M.Əfəndiyev məqaləsində Ermənistan tərəfindən son 30 ildə ölkəmizə qarşı törədilən ekoloji terrora son qoyulduğunu, ekoloji tarazlığın təmin olunması və dayanıqlı, təmiz ətraf mühitin yaradılması, habelə işğaldan azad edilmiş torpaqlarda yaşayacaq insanlarımızın rifah halının daha da yaxşılaşdırılması istiqamətində işlərin sürətlə və yüksək səviyyədə aparıldığını xüsusi vurğulayıb.
Bölmənin digər xəbərləri
