FAO-nun sessiyasında Ermənistan nümayəndəsinin əsassız iddialarına tutarlı cavab verilib
Roma, 30 aprel, AZƏRTAC
BMT-nin Ərzaq və Kənd Təsərrüfatı Təşkilatının (FAO) sessiyasında Ermənistan nümayəndəsinin Qarabağda “ərzaq böhranı” ilə bağlı həqiqəti əks etdirməyən iddialarına tutarlı cavab verilib.
AZƏRTAC xəbər verir ki, mərkəzi qərargahı Romada yerləşən FAO Şurasının aprelin 24-28-də keçirilən 172-ci sessiyasında son iclaslarda olduğu kimi, Rusiya ilə Ukrayna arasındakı hərbi qarşıdurmanın qlobal ərzaq təhlükəsizliyinə təsirləri əsas müzakirə mövzusu olub. Sözügedən məsələ budəfəki sessiyanın gündəliyinə “Qlobal ərzaq təhlükəsizliyi problemləri və hərəkətverici qüvvələri: Ukraynada və başqa yerlərdə münaqişələr və müharibələr, iqtisadi artımın yavaşlaması və tənəzzüllər, iqlim dəyişikliyi” sərlövhəsi ilə daxil edilib. İclas Rusiya və Ukraynanı dəstəkləyən ölkələr arasında hazırkı qlobal ərzaq böhranı kontekstində qarşılıqlı ittihamların səslənməsi, tərəflərin FAO tərəfindən mövzu ilə bağlı hazırlanmış layihəyə təkliflərinin müzakirəsi və bununla bağlı Şura üzvlərinin 4 səsverməsi ilə yadda qalıb.
Sessiyada təmsil olunan Ermənistanın nümayəndəsi Ukraynadakı hadisələrin ərzaq təhlükəsizliyinə təsirləri ilə bağlı müzakirələrin sonunda söz almağa cəhd göstərib. O, yalnız aprelin 26-da bu mövzu yekunlaşdıqdan sonra baş tutmuş səsvermə hüquqlarının bərpası ilə bağlı məsələyə həsr edilmiş iclasda söz alaraq Laçın yolu ilə ətrafında baş verən hadisələrin Azərbaycanın Qarabağ ərazisində yaşayan ermənilərin lazımi şəkildə ərzaq təminatına imkan vermədiyini və oradakı insanların kənd təsərrüfatı ilə məşğul olmasına maneələr törədildiyini iddia edib, Ermənistanın ölkəmizə qarşı bu kimi digər böhtan və təxribat xarakterli ənənəvi ittihamlarını səsləndirib.
Azərbaycanın İtaliyadakı səfirliyin birinci katibi Nemət Əliyev dərhal cavab haqqından istifadə edərək, Ermənistan təmsilçisinin ölkəmizə qarşı yalan və əsassız bəyanatını, o cümlədən Laçın yolunun bağlı olması ilə bağlı iddialarını qətiyyətlə rədd edib. Eyni zamanda, Azərbaycanın suveren ərazisi olan Laçın yolunun başlanğıcında sərhəd-nəzarət mexanizminin təsis edilməsini şərtləndirən təhlükəsizlik amilləri, Ermənistanı bu yoldan qeyri-qanuni hərbi məqsədlər üçün istifadə etdiyi ilə bağlı məqamlar vurğulanıb, Azərbaycan tərəfindən öz suveren ərazisində sərhəddə nəzarət-buraxılış məntəqəsi yaradılmasının ölkəmizin suveren və legitim hüququ olduğu, bunun heç bir beynəlxalq sənədə və məhkəmə qərarına qarşı olmadığı vurğulanıb.
Bildirilib ki, 30 ilə yaxın işğal dövründə 9 şəhər və yüzlərlə kəndi talan edən, bir milyona yaxın azərbaycanlıya qarşı etnik təmizləmə həyata keçirən, onları öz evlərinə qayıtmaq hüququndan məhrum edən, Azərbaycan torpaqlarının işğalına son qoyulması barədə beynəlxalq təşkilatların və tərəfdaşların çağırışlarına məhəl qoymayan Ermənistanın özünü sülhpərvər tərəf kimi göstərməsi və Azərbaycanı etnik təmizləmədə ittiham etməsi riyakarlıq və saxtakarlıq nümunəsidir.
Səfirliyin əməkdaşı işğal dövründə Ermənistanın təkcə Azərbaycan xalqına deyil, eyni zamanda, onun təbiətinə qarşı təcavüz siyasəti həyata keçirdiyi, bunun kənd təsərrüfatına, biomüxtəlifliyə və təbii sərvətlərə fəlakətli dərəcədə mənfi təsir etdiyini vurğulayıb. İlkin qiymətləndirmələr əsasında dəyəri 100 milyonlarla ölçülən suvarma infrastrukturu, kənd təsərrüfatı texnikası parkı və anbarların dağıdıldığı, irriqasiya və digər əlaqədar infrastrukturun məhv olduğu, yüz minlərlə iribuynuzlu və xırdabuynuzlu mal-qaranın tələf edildiyi və mənimsənildiyi qeyd olunub. İşğal dövründə Ermənistan işğalçı silahlı qüvvələrinin əlverişli dislokasiyasından Azərbaycanın ekologiyasına və kənd təsərrüfatına qarşı silah kimi istifadə etdiyi vurğulanıb.
İşğal dövründə Ermənistanın çayları çirkəndirməklə ətraf mühitə ciddi ziyan vurduğu, Azərbaycanın öz torpaqlarının azad etməsindən sonra sertifikatlaşdırılmış yerli və xarici laboratoriyalarda aparılmış monitorinqlərin nəticələrinə əsasən çay sularında ağır metalların yüksək miqdarının müəyyən edildiyi, çayda suyun keyfiyyətinin kəskin dəyişməsinin onun məişət və kənd təsərrüfatı məqsədləri üçün istifadəsinə son dərəcə mənfi təsir göstərə biləcəyi qeyd olunub. Vurğulanıb ki, Ermənistanın bütün hərbi cinayət əməlləri beynəlxalq normaların və insan hüquqları kimi qlobal strategiyalar üzrə öhdəlikləri, habelə BMT-nin Dayanıqlı İnkişaf Məqsədləri, FAO və Avropa İttifaqının kənd təsərrüfatı və ərzaq təhlükəsizliyi üzrə strategiyalarına əsaslanan normaların pozulmasının bariz sübutudur.
Qeyd edilib ki, ərazilərimizin Ermənistan tərəfindən intensiv minalanması səbəbindən torpaqlarımız azad olunduqda sonra da Azərbaycan fermerləri orada kənd təsərrüfatı fəaliyyəti ilə məşğul ola bilmirlər. Vətən müharibəsindən sonra da Ermənistan Azərbaycan ərazisinə piyada əleyhinə minalar yerləşdirməkdə davam edir. Postpandemiya şəraitində davamlı qida məhsullarının yaradılması ilə bağlı qlobal çağırışları nəzərə alaraq, Ermənistanın bu fəaliyyətinin regional ərzaq təhlükəsizliyinə bilavasitə təhlükə olduğu bildirilib.
Ermənistanı Azərbaycanın birmüxtəlifliyinə qarşı təcavüzə və regionun unikal ekosisteminin deqradasiyasına son qoymaq üçün zəruri tədbirlər görməyə vadar etmək üçün beynəlxalq təşkilatların səylərinin birləşdirməsinin vacibliyi vurğulanıb. Eyni zamanda, Ermənistan tərəfinə belə təxribatlardan əl çəkmək, ölkələrin ərazi bütövlüyü və suverenliyi kimi prinsiplər əsasında Azərbaycanla münasibətlərin qurulması səylərinə məsuliyyətlə yanaşmaq, sülh danışıqlarına müxtəlif bəhanələrlə maneə törətmək əvəzinə, konstruktiv mövqe nümayiş etdirmək tövsiyə olunub. Ermənistan, həmçinin beynəlxalq birliyi özünün qarayaxma kampaniyasına alət etmək, o cümlədən bu məqsədlə Beynəlxalq Ədalət Məhkəməsinin məlum qərarını təhrif etmək cəhdlərinə son qoymağa çağırılıb.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
