Faşizm üzərində Qələbənin 81-ci ildönümü Polşada qeyd olunub
Vyana, 7 may, AZƏRTAC
Faşizm üzərində Qələbənin 81-ci ildönümü münasibətilə Azərbaycanın Polşadakı səfirliyinin təşkilatçılığı ilə Varşava şəhərinin müsəlman-tatar qəbiristanlığında, azərbaycanlı zabit Vəli bəy Yadigarın məzarı qarşısında tədbir keçirilib.
AZƏRTAC xəbər verir ki, mərasimdə səfir Nərgiz Qurbanova, səfirliyin əməkdaşları, Polşada akkreditə edilmiş Türk Dövlətləri Təşkilatına daxil olan ölkələrin səfirləri və dini icmanın təmsilçiləri iştirak ediblər.
Tədbirin əvvəlində Vəli bəy Yadigarın məzarı üzərinə əklil qoyulub, onun və müharibədə həlak olmuş bütün soydaşlarımızın ruhuna dualar oxunub.
Mərasimdə çıxış edən səfir Nərgiz Qurbanova qeyd edib ki, Azərbaycan müharibə illərində həm ön, həm də arxa cəbhədə mühüm rol oynayıb. 681 mindən artıq azərbaycanlı müharibədə iştirak edib, onların yarıdan çoxu həlak olub və ya itkin düşüb. Respublikanın hər beşinci sakininin cəbhəyə yollandığı diqqətə çatdırılıb və vurğulanıb ki, Azərbaycan ərazisində formalaşdırılmış milli diviziyalar Qafqazdan Berlinədək şərəfli döyüş yolu keçib. Azərbaycan əsgərləri göstərdikləri igidliyə görə yüksək dövlət mükafatları, yüzdən çox azərbaycanlı isə Sovet İttifaqı Qəhrəmanı adına layiq görülüb.
Nərgiz Qurbanova, həmçinin Azərbaycanın müharibə dövründə enerji təminatında oynadığı mühüm rolu xüsusi qeyd edərək, akademik Yusif Məmmədəliyevin rəhbərliyi ilə həyata keçirilən elmi nailiyyətləri vurğulayıb, Azərbaycan xalqının arxa cəbhədə göstərdiyi fədakarlıqdan bəhs edib.
Tədbirdə səfir Polşa ilə tarixi əlaqələrə də toxunub və görkəmli azərbaycanlı zabit Vəli bəy Yadigarın fəaliyyətini xüsusi qeyd edib. Onun həm Azərbaycan Xalq Cümhuriyyəti ordusunda, həm də Polşa Silahlı Qüvvələrində xidmət etdiyi, İkinci Dünya müharibəsi illərində Polşa müqavimət hərəkatında iştirak etdiyi və 1944-cü il Varşava üsyanının təşkilində mühüm rol oynadığı vurğulanıb.
Çıxışının sonunda səfir diqqətə çatdırıb ki, bu kimi tədbirlər tarixi yaddaşın qorunması və gələcək nəsillərə ötürülməsi baxımından mühüm əhəmiyyət kəsb edir. Azərbaycanın qələbəyə verdiyi töhfə və Vəli bəy Yadigar kimi şəxsiyyətlərin fəaliyyəti azadlıq və sülh uğrunda mübarizənin ümumbəşəri dəyərlərə əsaslandığını bir daha təsdiqləyir.
Daha sonra tədbirdə Varşava Universitetinin Asiya və Afrika mədəniyyətləri fakültəsi nəzdində fəaliyyət göstərən Azərbaycan Araşdırmaları Mərkəzinin rəhbəri Şəhla Kazımova çıxış edərək, Azərbaycanın nasizm üzərində qələbəyə verdiyi mühüm töhfəni vurğulayıb, həm cəbhədə döyüşənlərin, həm də bütövlükdə cəmiyyətin fədakarlığını qeyd edib. O, xüsusilə Azərbaycanəsilli zabitlərin Polşa tarixindəki roluna diqqət çəkərək, Vəli bəy Yadigar və Cahangir Kazım bəy kimi şəxsiyyətləri xatırladıb, eyni zamanda, müharibə illərində fəal iştirak edən qadınların xidmətlərini xüsusi qeyd edib.
Tədbirin sonunda iştirakçılarına çay süfrəsi açılıb və xalqımızın adət-ənənəsinə uyğun olaraq təamlar təqdim olunub.
Bölmənin digər xəbərləri
