FAŞİZM ÜZƏRİNDƏ QƏLƏBƏYƏ MÜSƏLMANLARIN TÖHFƏSİ SARATOVDA QEYD OLUNACAQDIR
AZƏRTAC Müstəqil İslam İnformasiya Agentliyinə istinadla xəbər verir ki, Saratovda Böyük Vətən müharibəsində qələbənin 60 illiyinə həsr olunmuş tədbirlərdə çoxmillətli sovet xalqının faşizm üzərində qələbəsinə müsəlmanların töhfəsi xüsusi qeyd olunacaqdır. Volqaboyu Müsəlmanları Ruhani İdarəsinin (MRİ) mətbuat xidmətinin rəhbəri Əhməd Məhmədov bildirmişdir ki, belə bir qərar bu günlərdə Saratov vilayətinin qubernatoru yanında Təşkilat komitəsinin iclasında qəbul edilmişdir.
İclasda çıxış edən imam Müqəddəs Bibarsov təkcə Rusiya üçün deyil, bütün dünya üçün əlamətdar olan qələbənin qazanılmasına müsəlmanların mühüm töhfə verdiyini bildirmiş və Təşkilat komitəsinin üzvlərini tədbirlərdə müsəlmanların da rolunu xüsusi vurğulamağa çağırmışdır.
