Fatih Birol: Qlobal sənayedə yeni, təmiz texnologiyalar dövrü başlayır
Bakı, 30 oktyabr, AZƏRTAC
Beynəlxalq Enerji Agentliyinin (BEA) icraçı direktoru Fatih Birol dünyanın sənayedə yeni, təmiz texnologiyalar dövrünə qədəm qoyduğunu bildirib.
AZƏRTAC xəbər verir ki, Fatih Birol Anadolu agentliyinə müsahibəsində deyib: “Ölkələrin gələcəyi günəş panelləri, külək turbinləri kimi təmiz texnologiyalara bağlıdır. Bu yarışda irəli keçə bilmək üçün dövlətlər arasında ciddi rəqabət var. İndi Çin bu sahədə ən önəmli bir oyunçudur, dünyada istehsal edilən günəş panelləri və batareyaların 80 faizi bu ölkənin payına düşür. Eyni zamanda, satılan hər iki elektromobildən biri də Çindədir. Pekinin bu addımlarını görən digər ölkələr də onunla rəqabətə girir. Xüsusən ABŞ bu sahəyə böyük sərmayələr ayırır. Avropada yerli təmiz texnologiya istehsalçılarını dəstəkləmək məqsədilə sıfır karbon emissiyası üzrə qanun layihəsi hazırlanır. Hindistan, Kanada və İndoneziya da müvafiq addımlar atır. Əsas məqsəd təmiz enerji texnologiyaları sahəsində başqa ölkədən asılı olmamaqdır”.
BEA-nın icraçı direktoru qeyd edib ki, nəqliyyat sektorunda yeni texnologiyaların tətbiqi, Çində iqtisadi artım kimi faktorlar neftə tələbatı müəyyən edəcək. Onun sözlərinə görə, qazıntı yanacaqlarının qiymətləri 2030-cu ilədək yüksək olacaq, amma sonra enməyə başlayacaq. Fatih Birol bunun səbəblərini belə izah edib: “İki il əvvəl satılan hər 25 avtomobildən biri elektriklə işləyirdi, lakin 2030-cu ildə hər iki avtomobildən biri elektrik mühərriki ilə satılacaq. Təbii ki, dünyada hələ onilliklər boyu neftə tələbat olacaq və onun qiymətlərində azalma da o qədər böyük olmayacaq. Bəzi ekspertlər neftin qiymətinin daim qalxacağı qənaətindədir, əlbəttə, onların fikirlərinə hörmətlə yanaşıram. Amma zamanın çarxını geri döndərmək, texnoloji tərəqqinin qarşısını almaq mümkün deyil”.
Keçən il qlobal neft sənayesinin 4 trilyon dollar tarixi gəlir əldə etdiyini diqqətə çatdıran Fatih Birol bildirib ki, nəhəng şirkətlərin əksəriyyəti gəlirinin böyük bir hissəsini təmiz texnologiya sahəsinə sərmayələrə ayırır. “Belə ki, ABŞ-ın “Exxon Mobil” kompaniyası mərkəzi Texas ştatında olan “Pioneer Natural Resources” hidrokarbonat şirkətini 69,5 milyard dollara almaq üçün kontrakt imzalayıb. Birləşmiş Ştatların digər iri enerji şirkəti “Chevron” isə gəlirindən 53 milyard dolları neft-qaz kəşfiyyatı aparan “Hess” kompaniyasının satın alınmasına xərcləyib. Göründüyü kimi, şirkətlərin seçimi də fərqlidir”, -deyə BEA-nın icraçı direktoru vurğulayıb.
Bölmənin digər xəbərləri
