Fazil Məmmədov: Stolüstü tennisçilərimiz İslamiadada uğurla çıxış etdilər
Bakı, 27 may, S.Quliyev, S.Allahverdiyeva, AZƏRTAC
Azərbaycan növbəti dəfə mötəbər beynəlxalq idman tədbirinə uğurla ev sahibliyi etdi. Əllidən çox müsəlman ölkəsindən üç mindən artıq atletin idmanın 20 növü üzrə mübarizə apardığı “Bakı-2017” IV İslam Həmrəyliyi Oyunları bütün dünyanın diqqət mərkəzində oldu.
Azərbaycan idmançıları İslamiadada digər idman növlərində olduğu kimi, stolüstü tennis yarışında da uğurla çıxış etdilər. Azərbaycan Stolüstü Tennis Federasiyasının vitse-prezidenti Fazil Məmmədov “Bakı-2017”nin ölkəmiz üçün əhəmiyyəti, eləcə də stolüstü tennisçilərimizin uğurlu çıxışları barədə AZƏRTAC-ın müxbirinin suallarını cavablandırıb.
- Fazil müəllim, “Bakı-2017”nin Azərbaycan üçün əhəmiyyətini necə qiymətləndirirsiniz?
- IV İslam Həmrəyliyi Oyunlarının Bakıda təşkili dünyaya bir mesaj oldu. Ölkəmiz İslam dəyərlərinə nə qədər sadiq və bağlı olduğunu bir daha nümayiş etdirdi. Oyunların rəmzi olaraq suyun seçilməsi saflıq əlaməti kimi dəyərləndirilir. Azərbaycan sülh, əmin-amanlıq, inkişaf, sağlam həyat tərzi ilə dünyada tanınan ölkədir. Mötəbər yarış ölkəmizin dünyada tanıdılması istiqamətində mühüm rol oynadı. İki il əvvəl Azərbaycan tarixdə ilk dəfə Avropa Oyunlarına yüksək səviyyədə ev sahibliyi etdi. Respublikamızda təşkil olunan hər bir tədbirdən sonra Azərbaycan öz təşkilatçılıq qabiliyyəti ilə seçilir və digər ölkələrə nümunə kimi təqdim olunur. Hətta ölkəmizdə olan qonaqlar IV İslam Həmrəyliyi Oyunlarının “Rio-2016” Yay Olimpiya Oyunlarından daha yüksək səviyyədə təşkil olunduğunu diqqətə çatdırıblar.
- Stolüstü tennis yığmamızın IV İslam Həmrəyliyi Oyunlarındakı çıxışı barədə nə deyə bilərsiniz?
-Stolüstü tennisçilərimizin IV İslam Həmrəyliyi Oyunlarındakı çıxışını yüksək qiymətləndirirəm. Ən əsası idmançılarımız əzmkarlıq nümayiş etdirərək mükafatçılar sırasında yer ala bildilər. Komanda hesabında qızlarımız gümüş, oğlanlar isə bürünc medala sahib oldular. Bir neçə il əvvəl İslam Həmrəyliyi Oyunlarının hazırlığına başlamışdıq. Artıq idmançılarımızın reytinqi getdikcə yüksəlməkdədir. Qazanılan nəticəni qənaətbəxş hesab etmək olar. Təbii ki, idmançılarımızın qızıl medala sahib olmasını çox istəyirdik. Ancaq bu, idmandır. Ölkəmizdə stolüstü tennisin üç il əvvəlki vəziyyəti ilə indiki arasında böyük fərq var. İddialı komandamız var və gələcəkdə daha böyük uğurlar əldə edəcəyik.
- İdmanın bu növünün kütləviləşməsi istiqamətində federasiya tərəfindən hansı işlər görülür?
-2014-cü ildə Şahin Mustafayev Azərbaycan Stolüstü Tennis Federasiyasına prezidenti seçilib. Həmin ilin fevralında “2015-2020-ci illərdə Fəaliyyət Planı” hazırlanıb. Fəaliyyət Planı 4 əsas istiqamət üzrə hazırlanıb. Bunlar kütləviliyin artırılması, yığma komandanın inkişafı, mütəxəssislərin peşəkarlığının artırılması və peşəkar klub sisteminin formalaşdırılmasından ibarətdir. Kütləvilik bu istiqamətlərdən biridir. Bu istiqamətdə təqvim planına uyğun olaraq, bütün işlər yerinə yetirilir. Bundan əlavə, sahəvi - jurnalistlər, nazirlik əməkdaşları, tələbələr, autizmli və daun sindromlu uşaqlar arasında stolüstü tennis yarışları təşkil olunub. Autizmli uşaqların cəmiyyətə inteqrasiyasını təmin etmək üçün bir neçə yarış keçirilib. Ötən il yetkinlik yaşına çatmayan uşaqlar üçün cəzaçəkmə müəssisəsinə stolüstü tennis avadanlığı hədiyyə olunub və orada yığma komandamız nümunəvi çıxışı ilə yadda qalıb. Həmçinin yoldaşlıq görüşü təşkil olunub və cəzaçəkmə müəssisəsinin sakinlərinə hədiyyələr təqdim edilib. Sağlam həyatın təbliği baxımından bu gözəl addımdır.
Kütləviliyə xidmət edən ən vacib məsələlərdən biri də federasiya ilə Bakıdan əlavə, 11 rayonda fəaliyyət göstərən müəllimlərlə müqavilələrin bağlanmasıdır. Müqaviləyə əsasən müəllimlər 6-9 yaşlı uşaqlara idmanın bu növünün sirlərini öyrədirlər. İdmandan əlavə, bu uşaqların sağlam həyat tərzinə cəlb olunması deməkdir. Artıq bunun bəhrəsini görürük. Hər il müəllimlər federasiyaya 5 qız və 5 oğlan stolüstü tennisçi təqdim edir. Həmçinin Dənizkənarı Milli Parkda iki stolüstü tennis yerləşdirilib ki, bu da həvəskarların ixtiyarına verilib. Sumqayıt bulvarında federasiya tərəfindən böyük idman kompleksi tikilir. Bu kompleks əhaliyə də xidmət edəcək, idmançılarımız orada hazırlıq keçəcəklər.
- Ölkəmizdə stolüstü tennis üzrə hər hansı irimiqyaslı turnirin keçirilməsi nəzərdə tutulubmu?
- İlk belə yarış birinci Avropa Oyunlarından əvvəl təşkil olunub. O vaxt Avropa “Top-16” turniri keçirildi ki, yarışa 37 ölkədən nümayəndə heyəti qatılmışdı. Planda irimiqyaslı yarışların ölkəmizdə təşkili var. Ən çox uşaqlar arasında beynəlxalq turnirə ev sahibliyi etmək istəyirik. Bunun da əsas səbəbi uşaqların yarışa cəlb olunması, onların təcrübələrinin artırılmasıdır. Mayın 28-də Almaniyada dünya çempionatı başlayacaq. Yarışa Azərbaycan idmançıları da qatılacaqlar. Bununla yanaşı, federasiya rəhbərliyi də Beynəlxalq Stolüstü Tennis Federasiyasının ümumi yığıncağında və Avropa Konqresində iştirak edəcək. Tədbirlərdə yerli idmançılarımızın inkişafına təkan verə biləcək yarışların ölkəmizdə təşkilinə çalışacağıq. Hazırda bu istiqamətdə federasiya tərəfindən araşdırma aparılır.
- Fazil müəllim, bildiyiniz kimi AZƏRTAC IV İslam Həmrəyliyi Oyunlarının media tərəfdaşı kimi İslamiadanın yüksək səviyyədə işıqlandırılması üçün bütün imkanlarını səfərbər etdi. Agentliyin bu mötəbər yarışın işıqlandırması barədə nə deyə bilərsiniz?
- IV İslam Həmrəyliyi Oyunları zamanı stolüstü tennis yarışları “Sərhədçi” İdman Olimpiya Mərkəzində təşkil olunmuşdu. Mərkəzdə yerli və beynəlxalq media nümayəndələri üçün lazimi şərait yaradılmışdı. Yarışları yüksək peşəkarlıqla işıqlandırdığına görə Azərbaycan Dövlət İnformasiya Agentliyinə (AZƏRTAC) minnətdarlığımı bildirirəm. Yarışdan operativ xəbərlərlə, müsahibələrlə agentliyin saytından asanlıqla tanış olmaq mümkün idi. AZƏRTAC-ın “Bakı-2017” IV İslam Həmrəyliyi Oyunlarının media tərəfdaşı seçilməsi bizi çox sevindirmişdi. Çünki bu iş peşəkarlara həvalə olunmuşdu və AZƏRTAC bu çətin vəzifəni yüksək səviyyədə yerinə yetirdi.
- Çox sağ olun, Fazil müəllim, müsahibə üçün təşəkkür edirik.
- Sağ olun.
Bölmənin digər xəbərləri
