FİLA-NIN BAŞ KATİBİ BAKIDA SƏFƏRDƏDİR

31.05.2006 [20:09]
Çap et
A⁺ A^-

AZƏRTAC xəbər verir ki, Beynəlxalq Güləş Federasiyaları Assosiasiyasının (FİLA) baş katibi Mişel Düsson Bakıya ikigünlük səfərə gəlmişdir.

Qonaq Azərbaycan Güləş Federasiyasının prezidenti Abbas Abbasovla görüşmüş və iyunun 23-25-də Heydər Əliyev adına İdman-Konsert Kompleksində sərbəst və yunan-Roma güləşi üzrə keçiriləcək “Qızıl Qran-pri” beynəlxalq turnirinin final mərhələsinə hazırlıqla əlaqədar görülən işlərlə maraqlanmışdır. Bu yarışın Azərbaycanda keçirilməsi təşəbbüsünü irəli sürən Abbas Abbasova minnətdarlığını bildirən M.Düsson, idmançıların qəbulu və yerləşdirilməsi, turnirin yüksək səviyyədə keçirilməsi ilə bağlı görülmüş işlərdən razılığını ifadə etmişdir.

Abbas Abbasov xalqımızın ümummilli lideri, dahi şəxsiyyət Heydər Əliyevin Azərbaycanda idmanın inkişafı istiqamətində apardığı siyasətin hazırda dövlətimizin başçısı, Milli Olimpiya Komitəsinin prezidenti İlham Əliyev tərəfindən uğurla davam etdirilməsi nəticəsində ölkəmizin son illər beynəlxalq idman yarışlarının mərkəzinə çevrildiyini diqqətə çatdırmışdır. Həm “Qızıl Qran-pri” turnirinin, həm də, gələn il dünya çempionatının Bakıda keçirilməsinin əhəmiyyətindən danışan A.Abbasov 2008-ci il XXIX Pekin Yay Olimpiya Oyunlarına hazırlıqla əlaqədar bu yarışların güləşçilərə böyük töhfə verəcəyini vurğulamışdır.

Xatırladaq ki, “Qızıl Qran-pri” beynəlxalq turnirində 50-yə yaxın ölkədən idmançıların iştirakı gözlənilir.