FİNLANDİYALI BƏSTƏKAR AZƏRBAYCAN MÖVZUSUNDA BALET YAZMIŞDIR
Finlandiyalı bəstəkar Herman Rexberger tanınmış şair Çingiz Əlioğlunun “Qobustan ritmləri” poemasının motivləri əsasında eyni adlı balet yazmışdır. İndi xoreoqraflar bu əsəri tamaşaya hazırlayırlar. Yaxın vaxtlarda Helsinkidə baletin ilk tamaşası olacaqdır. On iki hissədən ibarət baletin musiqisi diskdə buraxılmışdır.
“Qobustan ritmləri” finlandiyalı bəstəkarın Azərbaycan mövzusunda yeganə əsəri deyildir. O, Çingiz Əlioğlunun “Alovlar” adlı şeri əsasında simfonik qravür də bəstələmişdir. Çingiz Əlioğlu əsərin yaranması səbəbini belə izah edir:
- Məncə simfonik qravürin yaranmasına bəstəkarın Yanar dağda olması təkan vermişdir. O, Bakıda qonaq olarkən birlikdə Yanar dağa getdik. Axşam idi, hava qaralmışdı... Ətrafdakı qəribə mənzərə, görünür, ona güclü təsir bağışlamışdır.
“Alovlar simfonik qravürü” və bəstəkarın mənim “Gecə və bahar”, “Günəşin doğmasından qürubadək” şerlərimə bəstələdiyi mahnılar Helsinkidə musiqisevərlərə təqdim olunmuşdur.
Bölmənin digər xəbərləri
