Folklor İnstitutu fəaliyyətini elmi-tədqiqata daha çox yönəldəcək
Bakı, 9 fevral, AZƏRTAC
AMEA Folklor İnstitutunun Elmi şurasının növbəti iclası keçirilib. Əvvəlcə Türkiyədə baş vermiş dəhşətli zəlzələ nəticəsində həlak olan insanların xatirəsi bir dəqiqəlik sükutla yad edilib.
Bu barədə AZƏRTAC-a institutdan məlumat verilib. Müəssisənin baş direktoru akademik Muxtar Kazımoğlu-İmanov şura üzvlərini gündəlikdəki məsələlərlə tanış edib. Bildirilib ki, AMEA üzrə elmi-tədqiqat strukturlarında paralelliklərin aradan qaldırılması, Folklor İnstitutunun fəaliyyətinin elmi-tədqiqata daha çox yönəldilməsi, işçilərinin sayının optimallaşdırılmasının zəruriliyi ilə əlaqədar bəzi struktur dəyişikliklərinin aparılması vacibdir. AMEA Rəyasət Heyətinin 2023-cü il 16 yanvar tarixli qərarı ilə elmi-tədqiqat strukturlarında paralelliklərin aradan qaldırılması məqsədilə Folklor İnstitutunun Musiqi folkloru şöbəsi ləğv olunub, oxşar şöbələrin bazasında AMEA Memarlıq və İncəsənət İnstitutunun daxilində müvafiq elmi şöbə yaradılıb. Musiqi folkloru şöbəsinin ləğvi ilə əlaqədar “Qorqud” ansamblının Folklor İnstitutunun nəzdində fəaliyyəti elmi əhəmiyyətini itirib. Akademik vurğulayıb ki, 1994-cü ildən AMEA-nın Folklor Sarayı Elmi-Mədəni Mərkəzinin nəzdində fəaliyyət göstərmiş “İrs” folklor ansamblı 2003-cü ildən həmin mərkəzin bazasında yaradılan Folklor İnstitutunun struktur vahidinə çevrilib. 2017-ci ildə ansamblın adı dəyişdirilərək “Qorqud” adlandırılıb. Ansambl unudulmuş xalq mahnılarının rekonstruksiyası, lentə alınması və təbliği sahəsində əhəmiyyətli işlər görüb, klassik ifaçılıq ənənələrinin qorunması ilə məşğul olub. Ansambl institutun Musiqi folkloru şöbəsi ilə birbaşa bağlı olub və şöbədə aparılan elmi-tədqiqat işlərinə praktiki yardım göstərib.
Elmi şuranın üzvləri məsələyə münasibət bildirərək, “Qorqud” folklor ansamblının fəaliyyətinə xitam verilməsini məqsədəuyğun hesab ediblər.
İclasda Müasir folklor şöbəsinin müdiri filologiya elmləri doktoru, professor Füzuli Bayatın “Dini folklor anlayışı: sosial funksiyası, mövzu dairəsi” mövzusunda məruzəsi dinlənilib. Füzuli Bayat bildirib ki, dini folklor ümumilikdə dinin antropologiyası, sosiologiyası, din fəlsəfəsi kimi gənc sayıla biləcək müasir tədqiqat istiqamətlərindən biridir. Lakin dini folklor bu elmlərdən fərqli olaraq müqəddəs dini kitablardan çıxış etmir, dinin içində olanları öyrənmir.
Professor məruzəsində din və mifologiya mövzusuna geniş yer ayırıb. Alim vurğulayıb ki, son dövrlərdə formalaşan mövzuya görə, nə mifologiya din üçün qaynaq olub, nə də din miflərin, əfsanələrin yaranmasına səbəb olub. Bunlar ilahi bilginin müxtəlif səviyyələrdə paylaşılmasıdır, yəni hər ikisi ilahi mənşəlidir, hər ikisi eyni vaxtda ortaya çıxmışdır.
Sonda mövzu ətrafında müzakirələr və fikir mübadiləsi aparılıb.
Bölmənin digər xəbərləri
