FRANSA PREZİDENTİ İORDANİYA KRALINI QƏBUL ETMİŞDİR
AZƏRTAC-ın xüsusi müxbiri Yelisey sarayının mətbuat xidmətinə istinadla xəbər verir ki, avqustun 27-də Fransa Prezidenti Nikola Sarkozi öz iqamətgahında İordaniya Haşimilər Krallığının başçısı kral ll Abdullahı qəbul etmişdir.
Tərəflər Fransa ilə İordaniya arasında bütün sahələrdə əməkdaşlığın inkişafından danışmış, ümumi maraqlara xidmət edən ikitərəfli əlaqələrin yaxşılaşdığını razılıq hissi ilə bildirmişlər.
Prezident və kral ticarət, iqtisadi və strateji sahələrdə iki ölkə arasında əməkdaşlığın daha da genişləndirilməsinin vacibliyini vurğulamışlar.
Ölkə başçıları hər iki dövlətin strateji maraqlarına cavab verən zəruri tərəfdaşlığın gücləndirilməsi barədə Fransa və İordanya xarici işlər nazirlərinin may ayında imzaladıqları niyyət protokolunu yüksək qiymətləndirmişlər.
Görüşdə müasir və müstəqil Fələstin dövlətinin yaradılması istiqamətində Yaxın Şərqdə sülh prosesində irəliləyişin vacibliyi qeyd edilmiş, Avropa İttifaqı ilə Yaxın Şərq və Şimali Afrika ölkələri arasında əməkdaşlıq məsələlərinə toxunulmuşdur.
Livan ilə Suriya arasında ikitərəfli əlaqələrin yaradılmasına münasibət bildirmiş Nikola Sarkozi və ll Abdullah, iki ölkə arasında diplomatik əlaqələrin yaradılmasını regionda sülhün təmin edilməsi yolunda müsbət addım kimi qiymətləndirmişlər.
Bölmənin digər xəbərləri
