Fransa sularında TFA nümunələrin 92 faizində tapılıb
Paris, 4 dekabr, AZƏRTAC
Fransa qida, ətraf mühit və iş sağlamlığı Milli Agentliyi (Anses) 2023–2025-ci illəri əhatə edən genişmiqyaslı araşdırmanın nəticələrini açıqlayıb. Tədqiqat zamanı içməli və xam sularda 35 PFAS növü araşdırılıb. Onlardan 20-si xam suda, 19-u isə kran suyunda aşkarlanıb.
AZƏRTAC xəbər verir ki, ən çox rast gəlinən maddə trifloroasetik turşu (TFA) olub. O ölkə üzrə götürülmüş 1200-dən çox nümunənin 92 faizində müəyyən edilib.
TFA rəsmi su nəzarətində hələ izlənilməsə də, yüksək davamlılığı və sağlamlığa mümkün təsirləri səbəbindən EFSA tərəfindən yenidən qiymətləndirilir.
TFA 2025-ci il yanvarın 12-dək Fransanın mütləq izləməli olduğu 20 PFAS siyahısına daxil deyil. Lakin Anses həmin maddələrin hamısını araşdırıb və onlardan 11-nin sularda aşkarlandığını bildirib. Daha tez-tez müşahidə olunanlar: PFHxS – 21,7 faiz; PFOS – 19,1 faiz; PFHxA – 16,1 faiz.
Anses, həmçinin 15 əlavə PFAS növü üzrə də ölçmələr aparıb. Bu maddələr arasında TFMSA (“trifluorometansulfons” turşusu) xüsusilə diqqət çəkib və o içməli su nümunələrinin 13 faizində aşkarlanıb. Anses nəticə olaraq bildirir ki, TFA başda olmaqla, ölçmə kampaniyasında aşkarlanan bir sıra PFAS növləri gələcəkdə sabit su monitorinqi proqramına daxil edilə bilər. Bu, Fransada PFAS çirklənməsi ilə bağlı daha dəqiq və davamlı nəzarət mexanizmi yaratmağı hədəfləyir.
Bölmənin digər xəbərləri
