Fransada fermerlər “İlbiz əməliyyatı” həyata keçirib, yolu bağlayıblar
Paris, 14 yanvar, AZƏRTAC
Fransanın Var departamentində fermerlərin keçirdikləri etiraz aksiyası bu gün səhər saatlarında A50 avtomagistralında ciddi nəqliyyat problemlərinə səbəb olub. Marsel ilə Tülon şəhərlərini birləşdirən əsas yolda, Bandol və Sen-Sir-sür-Mer arasında fermerlər tərəfindən təşkil edilən “İlbiz əməliyyatı” nəqliyyatın hərəkətini çətinləşdirib.
AZƏRTAC yerli radioya istinadla xəbər verir ki, fermerlər traktorlarla “La Kadyer-d’Azur” körpüsü istiqamətində hərəkət edərək, yolun üç hərəkət zolağından ikisini tutublar. Bu isə Tülon–Marsel istiqamətində uzun tıxaclara və ciddi ləngimələrə səbəb olub.
Aksiyada, əsasən, üzümçülük sahəsində fəaliyyət göstərən fermerlər iştirak ediblər. Onlar istehsal xərclərinin artmasından, gəlirlərin azalmasından və ümumilikdə əlverişsiz iqtisadi şərtlərdən narazı olduqlarını deyiblər. Fermerlər təsərrüfatlarının dayanıqlığını qorumaq üçün dövlət orqanlarını daha konkret və təsirli dəstək tədbirlərini həyata keçirməyə çağırıblar.
Yerli kənd təsərrüfatı təşkilatlarının nümayəndələri, xüsusilə, Var departamentinin FDSEA həmkarlar ittifaqının və Gənc Fermerlər Birliyinin təmsilçiləri bu etiraz aksiyalarını kənd təsərrüfatı sektorundakı ağır iqtisadi vəziyyətə etiraz və çətin vəziyyətdə olan sahələrə dəstək məqsədilə təşkil etdiklərini bildiriblər.
Bölmənin digər xəbərləri
