Fransada “Rafale F5” döyüş təyyarələri üçün yeni nəsil hipersəs nüvə raketi hazırlanır
Paris, 16 iyun, AZƏRTAC
Fransanın Müdafiə Nazirliyinin Silahlanma Baş İdarəsi (DGA) ölkənin yeni nəsil nüvə çəkindirmə qabiliyyətinin əsas elementlərindən biri olacaq dördüncü nəsil hava-yer nüvə raketi ASN4G-nin hazırlanmasının MBDA şirkətinə həvalə ediləcəyini açıqlayıb. Yeni raketin 2035-ci ildən etibarən gələcəyin “Rafale F5” döyüş təyyarələrində istifadəyə verilməsi nəzərdə tutulur.
AZƏRTAC xəbər verir ki, DGA-nın açıqlamasına görə, ASN4G xüsusilə yüksək hipersəs sürəti sayəsində müasir və gələcək təhlükələr fonunda Fransanın havaəsaslı nüvə çəkindirmə potensialının etibarlılığını qorumağa imkan yaradacaq. Yeni raket hazırda istifadə olunan modernləşdirilmiş ASMPA raketini əvəz edəcək.
Mütəxəssislərin qiymətləndirmələrinə əsasən, ASN4G-nin sürəti Mach 5-dən (təxminən saatda 6130 kilometr) Mach 7-yə (saat 8600 kilometr) çata bilər. Bu xüsusiyyət raketin düşmən hava müdafiə sistemləri tərəfindən aşkarlanmasını və qarşısının alınmasını xeyli çətinləşdirəcək.
Yeni raketin uçuş məsafəsinin 1000 kilometrdən çox olacağı bildirilir ki, bu da ASMPA-nın imkanlarından təxminən iki dəfə artıqdır. DGA vurğulayır ki, ASN4G əvvəlki sistemlərlə müqayisədə texnoloji baxımdan tamamilə yeni mərhələni təmsil edir və bu sahədəki bilik və sənaye imkanlarına dünyada çox az ölkə malikdir.
ASN4G-dən həm Strateji Hərbi Hava Qüvvələri, həm də Nüvə Dəniz Aviasiyası tərəfindən istifadə ediləcək. Raketin əsas daşıyıcısı isə hazırda hazırlanmaqda olan “Rafale F5” döyüş təyyarəsi olacaq.
2033-cü ildə xidmətə qəbul edilməsi gözlənilən “Rafale F5” yeni nəsil AESA radarı, təkmilləşdirilmiş infraqırmızı sensorlar və pilotsuz döyüş aparatları ilə birgə əməliyyat imkanları ilə təchiz ediləcək. Təyyarə kəşfiyyat, radioelektron mübarizə və zərbə missiyalarını yerinə yetirən gizli döyüş dronlarını idarə edə biləcək.
Fransa rəsmilərinin planına görə, ASN4G raketi 2050-ci illərə qədər ölkənin nüvə çəkindirmə sisteminin əsas elementlərindən birinə çevriləcək.
Bölmənin digər xəbərləri
