Fransada tədbir zamanı səsləndirilən irqçi şüarlarla bağlı araşdırma başlanıb
Paris, 30 iyul, AZƏRTAC
Fransanın En departamentinin prefekti Lui-Ksavye Tirod Marboz şəhərində keçirilən bayram tədbiri zamanı səsləndirilən irqçi şüarlarla bağlı məhkəməyə müraciət edib.
AZƏRTAC xəbər verir ki, araşdırmaya səbəb iyulun 25-də keçirilən tədbir zamanı çəkilmiş və sosial şəbəkələrdə geniş yayılan videodur.
Görüntülərdə ənənəvi bayram geyimində olan bir qrup gəncin əlində pivə ilə dəfələrlə ərəbmənşəli insanlara qarşı işlədilən irqçi təhqir ifadəsini səsləndirdiyi görünür.
X platformasında yayılan video qısa müddətdə milyonlarla baxış toplayaraq, ictimaiyyətin ciddi reaksiyasına səbəb olub.
Prefekt Lui-Ksavye Tirod bu ifadələri qətiyyətlə pisləyərək bildirib ki, bu cür şüarların nə bayramla, nə Marboz feriası ilə, nə də En departamenti ilə heç bir əlaqəsi yoxdur. O, dərhal məhkəmə orqanlarına müraciət edib.
Marboz bələdiyyəsi də bəyanat yayaraq, irqçi şüarları qəbuledilməz adlandırıb. İlkin məlumata görə, həmin çağırışlar rəsmi tədbirlərdən kənarda səsləndirilib və bayramın təşkilatçıları ilə əlaqəsi olmayıb.
Hazırda hüquq-mühafizə orqanları hadisənin iştirakçılarını müəyyənləşdirmək və faktlara hüquqi qiymət vermək üçün araşdırmaları davam etdirir.
Bölmənin digər xəbərləri
