FRANSIZ ALİMİNİN PROQNOZLARI
Yaxın illər ərzində ABŞ Qafqaz və Mərkəzi Asiyaya nüfuz etməkdə davam edəcək, Avropa Birliyinin burada iştirakı isə Balkanda və Şərqi Avropadakı kimi fəal olmayacaqdır. Bunu Vaşinqtonun Strateji və Beynəlxalq Araşdırmalar Mərkəzindəki çıxışında beynəlxalq siyasət üzrə tanınmış mütəxəssis, fransalı alim Bruno Tetrays söyləmişdir.
“ABŞ xarici siyasətinin Avropa və Asiyaya təsiri” mövzusunda çıxış edən alim Birləşmiş Ştatların 2010-cu ilədək beynəlxalq əlaqələrinə nəzər salaraq, bu siyasətin perspektivlərini Avropanın necə qiymətləndirdiyini izah etmişdir. Onun sözlərinə görə, ABŞ-ın transatlantik əlaqələrində qarşılıqlı iqtisadi asılılıq “Vankuverdən Vladivostokadək” güclənəcəkdir. Bruno Tetrays yaxın gələcəkdə bölgənin əsas “siyasi oyunçularını” ABŞ, Rusiya və Avropa Birliyinin simasında görür. Onun fikrincə, ABŞ-Rusiya əlaqələrində enerji sahəsində əməkdaşlıq üstünlük təşkil edəcəkdir. Avropa Birliyi genişlənəcək və yeni Birlik müqaviləsinin imzalanması mümkündür. Birləşmiş Ştatlara gəldikdə isə, o, bölgə dövlətləri ilə əlaqələrində çoxtərəfli deyil, ikitərəfli münasibətlərə etibar edəcəkdir. NATO-nun hərbi nüfuzuna nisbətən, siyasi rolu daha mühüm olacaqdır. Amerikanın Mərkəzi Asiyada hərbi mövcudluğu onu region dövlətlərinin təhlükəsizlik spektrində əsas elementlərdən birinə çevirəcəkdir.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
