Futzal üzrə Avropa çempionatının final mərhələsi iki arenada təşkil olunacaq
Bakı, 12 yanvar, AZƏRTAC
Yanvarın 19-dan fevralın 6-dək Niderlandda keçiriləcək futzal üzrə Avropa çempionatının final mərhələsi iki arenada təşkil olunacaq. A və C qrupunda yer alan komandalar Amsterdamdakı “Ziggo Dome”də, B və D qrupundakı iştirakçılar isə Qroningen şəhərindəki “Martini Plaza”da yarışacaqlar.
AZƏRTAC xəbər verir ki, Benthem Krouvel tərəfindən dizayn edilən “Ziggo Dome”nin inşasına 2009-cu ildə başlanılıb və 3 il sonra istifadəyə verilib. Arena kvadrat formasında olsa da, adı günbəzi ifadə edir. Xaricdən qara fonda olsa da, videotəsvirlərin nümayiş oluna biləcəyi 840 min led ilə əhatə olunub. Arena əsasən konsertlər üçün nəzərdə tutulsa da, burada müxtəlif idman yarışları da təşkil olunur. Tamaşaçı tutumu 17 minə qədər artırılır.
“Martini Plaza” isə 1969-cu ildə istifadəyə verilib. Arenanın tutumu tədricən artırılıb və 2000-ci ildə bu rəqəm 3900-ə çatdırılıb. Hazırda isə bu rəqəm 4500-ə bərabərdir. Burada da müxtəlif idman oyunları, xüsusilə də tennis və basketbol qarşılaşmaları, eləcə də sərgilər təşkil olunur. Hazırda “Donar” basketbol komandası ev oyunlarını bu məkanda keçirir.
Azərbaycan millisi Avropa çempionatının final mərhələsində D qrupunda mübarizə aparacaq. Yığmamız yanvarın 22-də “Martini Plaza”da Gürcüstan, dörd gün sonra İspaniya, ayın 29-da isə Bosniya və Herseqovina ilə qarşılaşacaq.
Bölmənin digər xəbərləri
