Bakı, 26 oktyabr, Elvin Camalov, AZƏRTAC

Oktyabrın 26-da Bakı Gəmiqayırma Zavodunda “Azərbaycan Xəzər Dəniz Gəmiçiliyi” QSC-nin sifarişi ilə 2 ədəd yeni unikal gəmi-bərənin tikintisi üzrə müqavilənin imzalanma mərasimi keçirilib.

AZƏRTAC xəbər verir ki, tədbirdə iqtisadiyyat naziri Şahin Mustafayev, SOCAR-ın prezidenti Rövnəq Abdullayev, “Bakı Beynəlxalq Dəniz Ticarət Limanı” QSC-nin baş direktoru Taleh Ziyadov, Azərbaycan Respublikasının Dövlət Dəniz Administrasiyasının rəisi Qüdrət Qurbanov, “Azərbaycan Xəzər Dəniz Gəmiçiliyi” QSC-nin sədri Rauf Vəliyev və digər rəsmi şəxslər, qonaqlar iştirak edib.

“Azərbaycan Xəzər Dəniz Gəmiçiliyi” QSC-nin sədri Rauf Vəliyev yeni gəmi-bərələrin layihəsini tədbir iştirakçılarına təqdim edərək bildirib ki, rəqabətədavamlı xidmət göstərmək üçün istənilən gəmiçilik şirkəti kimi, Azərbaycan Xəzər Dəniz Gəmiçiliyinin də donanmasının daim yenilənməsi və müasir tələblərə cavab verən gəmilərin tikintisi mühüm əhəmiyyət kəsb edir. Azərbaycanın regionda nəqliyyat-loqistika qovşağına çevrilməsi, ölkənin tranzit potensialının gücləndirilməsi məqsədilə, Transxəzər Beynəlxalq Nəqliyyat Marşrutu üzrə şərq-qərb və əks istiqamətdə yükdaşımalarda xüsusi rola malik olan və uzun illərdir Xəzərdə yeganə bərə operatoru kimi fəaliyyət göstərən Azərbaycan Xəzər Dəniz Gəmiçiliyi üçün bu gəmilərin tikintisi çox böyük əhəmiyyətə malikdir.

Gəmiçiliyin sədri bildirib ki, Azərbaycan Xəzər Dəniz Gəmiçiliyi donanmanın yenilənməsinə xüsusi həssaslıqla yanaşır və bazarın tələbinə uyğun yeni gəmilərin tikintisi daim ciddi diqqət mərkəzində saxlanılır. Azərbaycan Respublikasının Prezidenti İlham Əliyevin gəmiçilik sahəsinə göstərdiyi xüsusi qayğı və diqqətin nəticəsidir ki, son 3 il ərzində 15 ədəd yeni gəmi, o cümlədən 1 ədəd Xəzərdə ən böyük yedək-təchizat gəmisi, 8 ədəd 5,500 ton yükgötürmə qabiliyyətli quru yük gəmiləri, 1 ədəd 13 min tonluq tanker, 1 ədəd təchizat gəmisi, eləcə də “Bakı Gəmiqayırma Zavodu” MMC-də inşa edilən 1 ədəd liman-yedək və 3 ədəd sərnişin gəmisi gəmiçiliyin balansına qəbul edilib.

R.Vəliyevin sözlərinə görə, hazırda, Azərbaycan Xəzər Dəniz Gəmiçiliyinin donanmasında 13 ədəd gəmi-bərə, 2 ədəd Ro-Ro tipli gəmi var. Donanmada mövcud olan 13 gəmi-bərədən 7-si 28 vaqon tutumuna, 6-sı isə 52-54 vaqon götürmə imkanına malikdir. Son illər ərzində ölkə başçısının verdiyi tapşırıqlara uyğun olaraq, Azərbaycanda nəqliyyat-logistika sahəsində görülən işlər nəticəsində Transxəzər Beynəlxalq Nəqliyyat Marşrutu üzrə yükdaşımalarda artım müşahidə olunur. Ötən dövrün analoji dövrü ilə müqayisədə, 2016-cı ilin 9 ayı ərzində gəmiçilik tərəfindən Transxəzər marşrutu üzrə daşınan vaqonların sayında 14 faiz, TİR-larin sayında isə 3 dəfədən çox artım qeydə alınıb

“Yaxın vaxtlarda Bakı-Tbilisi-Qars kimi regional əhəmiyyətli strateji layihənin istismara verilməsi ilə əlaqədar, ölkəmiz üzərindən artması gözlənilən tranzit yüklərin vaxtında daşınmasında respublikamızın nəqliyyatçıları qarşısında qoyulan tapşırıqların müvəffəqiyyətlə yerinə yetirilməsi məqsədilə, yeni Ro-Pax/Bərə tipli gəminin konsepsiyasının hazırlanması üçün gəmiçilik bir neçə tanınmış layihə-konstruktor büroları ilə iş aparıb və nəticədə Odessa Dəniz Mühəndisliyi Bürosunun hazırladığı təklif üzərində dayanıb. Bununla bağlı, gəmiçilik son 1 ildən artıq müddətdə həm vaqon, həm də TİR götürmək imkanına malik unikal gəmi konsepsiyasının hazırlanması üçün bu büronun aparıcı mütəxəssisləri ilə uzunmüddətli texniki müzakirələr aparıb və Xəzər dənizində suyun səviyyəsi, yanalma körpülərinin maksimal imkanları nəzərə alınaraq, 100 sərnişin, 56 vaqon və ya 50 yük maşını (TİR) tutumlu Ro-Pax/Bərə tipli gəminin eskiz və texniki layihəsi hazırlanıb. Ölkə başçısının birbaşa dəstəyi və göstərişlərinə uyğun olaraq, bu gəmilərin tikintisi Bakı Gəmiqayırma Zavodu tərəfindən həyata keçiriləcək”, - deyə R.Vəliyev vurğulayıb.

R.Vəliyev qeyd edib ki, güclü infrastruktur və potensiala malik Bakı Gəmiqayırma Zavodu bu sifarişlərin öhdəsindən gəlməklə yanaşı, öz təcrübəsini də əhəmiyyətli dərəcədə inkişaf etdirəcəkdir. Eyni zamanda vurğulanıb ki, gəmiçilik bundan sonra da gəmi tikintisi üzrə sifarişlərini Bakı Gəmiqayırma Zavodunda yerləşdirməyi planlaşdırır. Bu gəmi tam yeni konsepsiya olaraq ilk dəfə tikiləcək, eləcə də bu cür gəminin ilk dəfə Bakı Gəmiqayırma Zavodunda və Azərbaycan Xəzər Dəniz Gəmiçiliyi üçün tikilməsi çox əlamətdar hadisədir. Eyni zamanda, tikiləcək yeni gəmilər bu günlərdə yaranmasının 3 ili tamam olan “Azərbaycan Xəzər Dəniz Gəmiçiliyi” Qapalı Səhmdar Cəmiyyəti üçün ölkə başçısı tərəfindən ən böyük hədiyyə və dəstəkdir.

İqtisadiyyat naziri Şahin Mustafayev bildirib ki, yeni gəmi ilə sərnişin, vaqonlar və avtomobillər daşınacaq. Ölkə rəhbərliyi səviyyəsində Azərbaycanın tranzit potensialından və onun əlverişli coğrafi mövqeyindən tam faydalanmaq üçün, tranzit yükdaşımalar sahəsində kifayət qədər ciddi islahatlar və irimiqyaslı işlər aparılır. Prezident İlham Əliyevin Fərmanı ilə Azərbaycan Respublikasının Tranzit Yükdaşımalar üzrə Koordinasiya Şurasının yaradılması buna bariz nümunədir. Eyni zamanda, Xəzərdə ən böyük Bakı Beynəlxalq Dəniz Ticarət Limanın tikintisi və orada azad zonanın yaradılması, Bakı-Tbilisi-Qars layihəsinin həyata keçirilməsi, Azərbaycan və İran arasında çatışmayan dəmir yolu xəttinin salınması və digər bu kimi irimiqyaslı layihələr Azərbaycanın regionda nəqliyyat-logistika qovşağına çevrilməsinə töhfə verəcək.

Ş.Mustafayevin sözlərinə görə, bununla bərabər, Tranzit Yükdaşımalar üzrə Koordinasiya Şurası və Azərbaycanın yükdaşımalarda iştirak edən müvafiq qurumları arasında aparılan məhsuldar əməkdaşlıq nəticəsində, Azərbaycan üzərindən daşınan tranzit yüklər üçün əlverişli şərait yaradılıb, yükdaşıma prosedurları sadələşdirilib, harmonikləşdirilib, tariflərdə şəffaflığa və endirimlərin tətbiqinə nail olunub, bu işlərin nəticəsi olaraq, tranzit yüklərin həcmində artım müşahidə olunur.

Nazir qeyd edib ki, bu gün Tranzit Yükdaşımalar üzrə Koordinasiya Şurasının və Transxəzər Beynəlxalq Nəqliyyat Marşrutunun aparıcı üzvü olan Azərbaycan Xəzər Dəniz Gəmiçiliyinin donanması üçün yeni unikal Ro-Pax/Bərə tipli gəmilərin tikintisi, ölkəmizin tranzit yükdaşımalar sahəsində həyata keçirdiyi strateji siyasətin məntiqi davamıdır. Belə ki, bu gəmilər Xəzər üzərindən artan vaqon və TİR daşıma həcmlərinin vaxtında və yüksək keyfiyyətlə nəqlinin təmin edilməsinə imkan verəcək.

“Eyni zamanda, qeyd edildiyi kimi bu və bundan sonrakı gəmi tikintisi sifarişlərin məhz Bakı Gəmiqayırma Zavodunda yerləşdirilməsi, yerli gəmiqayırma təcrübəsinin daha da genişləndirilməsinə və iqtisadiyyatımızın şaxələndirilməsinə xidmət edəcək. Son illər Azərbaycanda sənayenin inkişafı üçün xeyli işlər görülür və dövlət tərəfindən yerli istehsalçılara ciddi dəstək göstərilir. Bu baxımdan, Azərbaycanda ən böyük və unikal zavodlardan olan Bakı Gəmiqayırma Zavodu “Qaradağ” sənaye parkına rezident qəbul edilib və gəmi tikintisi üçün bütün növ malların idxalı üzrə ƏDV-dən və gömrük rüsumlardan azad edilib. Bu cür optimallaşdırma tədbirləri Azərbaycanda gəmiqayırma sənayesinin rəqabət qabiliyyətinin daha da artırılmasına müsbət təsir edir”, - deyə Ş.Mustafayev vurğulayıb.

Bakı Gəmiqayırma Zavodunun əsas səhmdarı olan SOCAR-ın prezidenti Rövnəq Abdullayev bu cür unikal konsepsiyaya malik və Xəzərdə ilk olan yeni Ro-Pax/Bərə tipli gəmilərin tikintisi üzrə sifarişin məhz Bakı Gəmiqayırma Zavodunda yerləşdirilməsinin çox sevindirici hal olduğunu bildirib. Bu sifariş Azərbaycanda gəmiçilik sahəsi üçün strateji əhəmiyyətə malikdir və yalnız Azərbaycan Xəzər Dəniz Gəmiçiliyinin donanmasının yenilənməsi üçün deyil, eyni zamanda Azərbaycanda yerli gəmiqayırma təcrübəsinin zənginləşməsi üçün çox mühümdür.

R.Abdullayev vurğulayıb ki, Azərbaycan Xəzər Dəniz Gəmiçiliyi nəqliyyat donanması üçün tələb olunan tankerlərin, quru yük gəmilərinin, eləcə də dənizdə neft və qaz əməliyyatlarının aparılmasına xidmət edən ixtisaslaşmış donanma üçün tələb olunan gəmilərin də tikintisi üzrə sifarişləri Bakı Gəmiqayırma Zavodunda yerləşdiriləcək.

R.Abdullayevin sözlərinə görə SOCAR eyni zamanda gəmiçiliyin xidmətlərindən istifadə edən ən iri şirkətdir. Gəmiçilik Neft Şirkətinin istər neft daşımaları, istərsə də dənizdə aparılan neft-qaz əməliyyatlarını təmin etmək üçün yeni gəmilər sifariş edəcək və neft sənayesinə daha müasir və geniş imkanlı gəmilərlə xidmət göstərəcək.

Azərbaycan Respublikası Dövlət Dəniz Administrasiyasının rəisi Qüdrət Qurbanov bildirib ki, son illər Dövlət Dəniz Administrasiyası və Azərbaycan Xəzər Dəniz Gəmiçiliyi arasında Azərbaycanda gəmiçiliyin inkişafı istiqamətinə sıx birgə işlər aparılır. 2014-cü ildə Azərbaycan gəmiçiliyi öz fəaliyyətini Xəzərdən kənar hövzələrdə bərpa edib və bununla da Azərbaycan gəmiçiləri yenidən beynəlxalq sularda Azərbaycan bayrağı altında üzən gəmilərdə işləmək imkanı əldə ediblər. Son illər ölkə başçısının köməyi ilə, gəmiçilik sahəsi sürətlə inkişaf edir, mühüm tədbirlər görülür və gəmiçilik sahəsində Azərbaycanda güclü normativ baza yaradılıb. Ölkəmizdə gəmiçilik sahəsində mövcud infrastrukturun təkmilləşdirilməsi, regionda ən iri, müasir və güclü potensiala malik Bakı Gəmiqayırma Zavodunun tikilməsi gəmiçilik sahəsinə dövlət tərəfindən göstərilən dəstəyin bariz nümunəsidir.

Yeni bərə-gəmilər ilə əlaqədar, administrasiyanın rəisi qeyd edib ki, unikal konsepsiyalı yeni bərələrin Azərbaycan gəmiçiliyində istismara verilməsi, Xəzərdə yükdaşıma bazarında Azərbaycan gəmiçiliyinin flaqman və aparıcı mövqeyindən xəbər verir.

Nəqliyyat donanmasının bundan sonra da mütəmadi əsasda yenilənməsinin mühümlüyünü vurğulayan Q.Qurbanov, bu tədbirlərin Azərbaycanın nəqliyyat-logistika strategiyası üçün əhəmiyyətli olduğunu qeyd edib.

Odessa Dəniz Mühəndisliyi Bürosunun baş direktoru Gennadi Yeqorov bir ildən artıq müddətdə Azərbaycan Xəzər Dəniz Gəmiçiliyi ilə sıx əməkdaşlıq etdiklərindən və Xəzərdə bu cür yeni konsepsiyalı layihənin həyata keçirilməsindən məmnun olduğunu bildirib.

Onun sözlərinə görə, bu yeni konsepsiya gəmiçiliyin mütəxəssisləri ilə aparılan uzunmüddətli texniki danışıqların nəticəsində, Xəzərdə mövcud vəziyyət, gəmiçiliyin vaqon, TİR və sərnişin daşımaları üzrə tələbatı və gözləntiləri nəzərə alınmaqla ən optimal variant kimi hazırlanıb. “Mən məmnuniyyətlə qeyd etməliyəm ki, bu birgə hazırlanmış konsepsiyadır və onun müəllif hüququ bizim büro ilə gəmiçiliyə məxsusdur”, - deyə Gennadi Yeqorov vurğulayıb.

Layihənin xüsusiyyətləri, onun üstünlükləri, bərənin texniki imkanları barədə məlumat təqdim edilib və bu layihənin son texnoloji yeniliklər nəzərə alınmaqla hazırlandığı bildirilib. Sözügedən layihənin Xəzər regionu üçün yeni olmasına baxmayaraq, Bakı Gəmiqayırma Zavodu ilə yaxından tanış olduğunu və buradakı infrastruktur və texniki imkanların ən yüksək səviyyədə olduğunu bildirən Yeqorov, zavodun bu cür unikal layihənin öhdəsindən asanlıqla gələcəyinə inandığını vurğulayıb.

Qeyd edək ki, 2 ədəd Ro-Pax/Bərə tipli gəminin tikintisi Bakı Gəmiqayırma Zavodu tərəfindən 132 milyon AZN məbləğində qiymətləndirilib.