GƏNC AŞIQLARIN AŞIQ ŞƏMŞİR ADINA III RESPUBLİKA MÜSABİQƏSİNƏ YEKUN VURULMUŞDUR

31.10.2006 [21:03]
Çap et
A⁺ A^-

AZƏRTAC xəbər verir ki, oktyabrın 31-də R.Behbudov adına Dövlət Mahnı Teatrında Mədəniyyət və Turizm Nazirliyinin dəstəyi ilə keçirilən gənc aşıqların Aşıq Şəmşir adına III Respublika Müsabiqəsi qaliblərinin yekun konserti olmuşdur.

Tədbiri mədəniyyət və turizm naziri Əbulfəs Qarayev açaraq, aşıq sənətini Azərbaycan folklorunun mirvarisi adlandırmış, bu yolda yorulmadan çalışanların fəaliyyətini yüksək qiymətləndirmişdir. O, gənc nəslə aşıq sənətini aşılamağın vacibliyini vurğulamışdır. Müsabiqədə respublikanın 33 rayonundan 84 nəfər gənc iştirak etmişdir.

Birinci mükafata (500 manat və I dərəcəli diplom) tovuzlu Günel Qurbanova, ikinci mükafata (300 manat və II dərəcəli diplom) qazaxlı Şahin Süleymanov, üçüncü mükafata (250 manat və III dərəcəli diplom) kürdəmirli Əhməd Mustafayev layiq görülmüşdür. Bir iştirakçıya dördüncü mükafat, beş nəfərə isə həvəsləndirici mükafat verilmişdir.

Ə.Qarayev mükafatları qaliblərə təqdim etmişdir.

Sonda müsabiqə qalibləri konsert proqramı ilə çıxış etmişlər.