Gənc dastançı aşıqlar bir arada...
Bakı, 28 aprel, AZƏRTAC
Azərbaycan Aşıqlar Birliyinin (AAB) fəaliyyətində aşıqların dastan ifaçılığına daim böyük önəm verilir, bu istiqamətdə müxtəlif layihələr həyata keçirilir.
AZƏRTAC xəbər verir ki, yaxın günlərdə gənc aşıqlardan Afil Bəxtiyar və Amil Bəxtiyarın ifasında “Məsum və Diləfruz”, Qəlbinur İbrahimli və İsgəndər Əzizovun ifasında “Adıgözəl və Aslan şah”, Elçin Rəşidoğlu və Elçin Məmmədovun ifasında “Abdulla Cahan” dastanları, Nəcəf Məmmədov və İmralı Fikrətoğlunun ifasında isə “Abbas və Gülgəz” dastanından parçalar sənətsevərlərə təqdim olunacaq.
Qeyd edək ki, gənc aşıqların repertuarında dastanların mühüm yer tutmasına xüsusi diqqət göstərilir. Bu, bir tərəfdən dastan söyləmə ənənəsinin qorunub saxlanılması üçün vacibdirsə, digər tərəfdən də sənətə gələn gənclərin bir aşıq kimi püxtələşmələrində, sənətin incəliklərinə bələd olaraq kamil sənətkar kimi yetişmələrində mühüm əhəmiyyətə malikdir. Bu səbəbdəndir ki, AAB-nin gənc aşıqlarla bağlı növbəti layihəsi məhz onların dastan ifaçılığına həsr olunub.
Bölmənin digər xəbərləri
