ĞƏNC RƏSSAMIN VAŞİNQTONDA SƏRGİSİ
ABŞ paytaxtında yerləşən Azərbaycan Ticarət və Mədəniyyət Mərkəzindəki Qalereyada gənc rəssam Şahin Şıxəliyevin əsərlərindən ibarət sərgi açılmışdır. Sentiyabrın 2-dək davam edəcək sərgidə 19 əsər nümayiş etdirilir. Bu əsərlər emosiyaların, hisslərin və dünyanı qəbul etmə tərzinin aynasıdır. Şahin Şıxəliyev deyir ki, dünyanı sarı, mavi, yaşıl tonlarda görürəm. Həyatda qara rənglər hərdən üstünlük təşkil etsə də onlara əsərlərimdə yer verməməyə calışıram. Gənc rəssam Azərbaycanın əməkdar rəssamı Tələt Şıxəliyevin ailəsində anadan olub. Atasının sənəti onun ücün bir məktəbdir. Etiraf edir ki, incəsənətdə nəyə nail olubsa atasına borcludur. Şahinin əsərləri 1999-cu ildən bəri artıq 5-ci dəfədir Birləşmiş Ştatlarda nümayiş etdirir. Bu ilin oktiyabrında isə Nyu-Yorkdakı SOHO qalereyasında onun şəxsi sərgisinin açılması gözlənilir. Şahin Şıxəliyev öz əsərlərini uğurlu hesab etməyə tələsmir. O deyir ki, əgər əsərlərim satılırsa, demək naliyyətlərim var.
Azərbaycan ticarət və mədəniyyət mərkəzində keçirilən sərginin açılış mərasimində sənətsevərlərlə yanaşı Vaşinqtondakı diplomatik nümayəndəliklərin, işgüzar dairələrinin təmsilçiləri də iştirak edirdilər. Şahin Şıxəliyevin əsərləri qonaqlarda müsbət təəssüratlar yaratdı.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
