Gənc vətənpərvərlər 20 Yanvar şəhidlərinin xatirəsini yad etmişlər
Bakı, 18 yanvar (AZƏRTAC). Gənc Vətənpərvərlər Birliyi 20 Yanvar faciəsinin 23-cü ildönümü ilə bağlı Səbail rayon 2 nömrəli humanitar texniki elmlər liseyində “20 Yanvar şəhidləri unudulmur” mövzusunda konfrans keçirmişdir.
Gənc Vətənpərvərlər Birliyindən AZƏRTAC-a bildirmişlər ki, tədbir Gənclər və İdman Nazirliyinin maliyyə dəstəyi ilə həyata keçirilən “Ümumtəhsil orta ixtisas və ali orta təhsil müəssisələrində fiziki hazırlıq vasitəsilə Azərbaycan dövlət rəmzlərinin təbliği üzrə yeni təşəbbüslər” layihəsi çərçivəsində təşkil edilmişdir.
Konfrans iştirakçıları 20 Yanvar şəhidlərinin xatirəsini bir dəqiqəlik sükutla yad etmişlər.
Tədbirdə çıxış edənlər Azərbaycanın müstəqilliyi və azadlığı uğrunda həlak olanların şəhidlik zirvəsinə ucalmalarını qəhrəmanlıq rəmzi kimi qiymətləndirmişlər. Azərbaycan Silahlı Qüvvələrinin Ali Baş Komandanı, Prezident İlham Əliyev tərəfindən şəhid ailələrinə hər zaman qayğı və diqqət göstərilməsi vurğulanmışdır.
Bildirilmişdir ki, Vətənin azadlığı və suverenliyi uğrunda canlarından keçmiş şəhidlərimizin əziz xatirəsi yaddaşlardan heç vaxt silinməyəcəkdir.
Sonra şagirdlər Qanlı Yanvar faciəsinə həsr olunmuş şeirlər söyləmişlər.
Tədbirdə, həmçinin 20 Yanvar hadisələrindən bəhs edən videoçarx göstərilmişdir.
Bölmənin digər xəbərləri
