GƏNCƏDƏ POLİS GÜNÜNƏ HƏSR OLUNMUŞ BAYRAM TƏDBİRİ KEÇİRİLMİŞDİR
AZƏRTAC xəbər verir ki, Gəncə Şəhər İcra Hakimiyyətinin iclas salonunda Azərbaycan polisinin 90 illiyinə və 2 İyul - Polis gününə həsr olunmuş təntənəli bayram tədbiri keçirilmişdir.
Tədbiri giriş sözü ilə şəhər icra hakimiyyətinin başçısı Eldar Əzizov açaraq, 1918-ci il iyulun 2-də Azərbaycan Xalq Cümhuriyyəti hökuməti tərəfindən daxili işlər orqanlarının yaradılmasının dövlətçilik tariximizdə əlamətdar hadisə olduğunu vurğulamış və onun keçdiyi şərəfli yoldan danışaraq, ən çətin anlarda dövlətçiliyimizin keşiyində mətanətlə dayanan polis işçilərini bayram münasibətilə təbrik etmişdir.
Ümummilli liderimiz Heydər Əliyevin, Azərbaycanın ərazi bütövlüyünün qorunması, eləcə də xidməti vəzifəsini yerinə yetirərkən şəhid olmuş polis əməkdaşlarının xatirəsi ehtiramla yad edildikdən sonra şəhər polis idarəsinin rəisi, polis polkovniki Rasim Musayevin 90 il şərəfli yol keçmiş Azərbaycan polisinin uğurlarından bəhs edən məruzəsi dinlənilmişdir.
Gəncə Apellyasiya Məhkəməsinin sədri Rafiq Məmmədov, şəhər prokurorunun müavini Kamil Yunusov, Milli Təhlükəsizlik Nazirliyi Gəncə şöbəsi rəisinin müavini Qafar Ələsgərli, Azərbaycan Texnologiya Universitetinin rektoru, professor Telman Məlikov, şəhər Gənclər və İdman Baş İdarəsinin rəisi Mövsüm Hüseynov və başqaları çıxış edərək, ölkəmizdə yaranmış bugünkü sabitlik və inkişafda Azərbaycan polisinin əməyini xüsusi qeyd etmiş və bu uğurları ulu öndər Heydər Əliyevin Azərbaycan polisinə göstərdiyi diqqət və qayğının nəticəsi kimi qiymətləndirmişlər.
Tədbirdə xidməti vəzifələrində fərqlənən bir qrup polis əməkdaşına şəhər icra hakimiyyətinin xatirə hədiyyələri təqdim edilmişdir. Hədiyyə alanlardan Təranə Şahmuradova çıxış edərək, onların əməyinə verilən qiymətə görə ölkəmizin başçısına minnətdarlığını bildirmişdir.
