GƏNCƏDƏKİ SOS UŞAQ KƏNDİNDƏ XEYRİYYƏ TƏDBİRİ KEÇİRİLMİŞDİR
AZƏRTAC xəbər verir ki, Ramazan ayının başlaması ilə əlaqədar “Qafqaz Media” İctimai Birliyi Gəncədəki SOS uşaq kəndində xeyriyyə tədbiri keçirmişdir.
Birliyin üzvləri və tədbirə qoşulan digər qonaqlar əvvəlcə kənddə uşaqların yaşayış şəraiti ilə yaxından tanış olmuşlar. Sonra kənddə yaşayan ana və uşaqlarla görüş keçirilmişdir.
Görüşdə SOS uşaq kəndinin direktoru Nəsimi Ələkbərli çıxış edərək, kəndin yaranma tarixi barədə məlumat vermiş və bu müqəddəs günlərdə onları yada salan “Qafqaz Media” İctimai Birliyinin üzvlərinə minnətdarlığını bildirmişdir.
Birlik üzvlərinin gətirdikləri hədiyyələr kəndin balaca sakinlərinə paylandıqdan sonra respublikamızın tanınmış incəsənət ustalarının iştirakı ilə konsert olmuşdur.
